یو اے ای میں پولیس نے کارروائی کرتے ہوئے مسجد کے باہر خاتون کے بھیس میں بھیک مانگنے والے ایک عرب شہری کو حراست میں لے لیا ہے۔
غیر ملکی ذرائع ابلاغ کے مطابق عرب شہری نے اپنی شناخت چھپانے کے لیے عبایا اور نقاب پہن رکھا تھا، ایک شہری کی اطلاع پر دبئی پولیس کے جنرل ڈیپارٹمنٹ آف کریمنل انویسٹی گیشن نے کارروائی کی۔
دبئی پولیس میں کریمنل انویسٹی گیشن ادارے کے ڈائریکٹر بریگیڈیئر جنرل علی سالم الشامسی کا کہنا تھا کہ دوران تفتیش بھکاری نے یہ جواز پیش کیا کہ خواتین کو مردوں کے مقابلے میں ہمدردی کی بنیاد پر زیادہ بھیک دی جاتی ہے۔
بریگیڈیئر جنرل علی سالم الشامسی کا مزید کہنا تھا کہ عرب شہری کی جانب سے پہلے تو فرار ہونے کی کوشش کی گئی، مگر اسے فوری کارروائی کرتے ہوئے گرفتار کرکے تحقیقات کا آغاز کردیا گیا ہے۔
بریگیڈیئر جنرل علی سالم الشامسی نے بھکاریوں کو رقم نہ دینے اور صرف جائز ذرائع سے عطیات دینے کی اہمیت پر بھی زور دیا، انہوں نے کہا کہ ایسے افراد سے محتاط رہیں جو رمضان المبارک میں لوگوں کی ہمدردی کا فائدہ اٹھاتے ہیں۔
جرمنی میں پاکستانی فیملی پر چاقو سے حملہ، ایک شخص جاں بحق
یاد رہے کہ دبئی پولیس کی جانب سے رمضان کے پہلے دن بھی کارروائی کی گئی تھی اور اس دوران 17 بھکاریوں کو گرفتار کرنے کا اعلان سامنے آیا تھا۔
