کراچی : ملیرندی عبور کرتےہوئے ایک شخص ندی میں ڈوب گیا، جس کی ویڈیو وائرل ہوگئی۔

تفصیلات کے مطابق کراچی میں ہونے والی بارشوں کے باعث ملیر ندی میں سیلابی ریلے کی صورت حال پیدا ہوگئی ہے۔

ایک افسوسناک واقعے میں ایک شخص ملیر ندی عبور کرتے ہوئے ندی میں گرگیا، جس کی ویڈیو بھی سوشل میڈیا پر وائرل ہورہی ہے۔

ویڈیو میں شہری کو ملیر ندی خطرناک طریقے سے کراس کرتے دیکھا جا سکتا ہے۔

ویڈیو میں دکھایا گیا ہے کہ ایک شخص کراچی ملیر ندی کو عبور کرنے کی کوشش کررہا ہے کہ اچانک پانی کے تیز بہاؤ کے باعث پھسل کر پانی میں جا گرا۔

مقتول کی شناخت محمد خان کے نام سے ہوئی ہے، حکام نے اس کی لاش کی تلاش شروع کر دی ہے۔

یاد رہے اس سے قبل کراچی کے ملیر ندی کے سیلابی ریلے میں گاڑی بہہ گئی تھی ، جس میں ایک ہی خاندان کے 6 افراد اور ان کا ڈرائیور سوار تھا۔

خیال رہے کراچی میں ہونے والی بارش کے بعد کورنگی کاز وے میں ایک بار پھر سیلابی صورتحال پیدا ہوگئی، جس کے بعد کسی ناخوشگوار واقعے سے بچنے کیلئے کورنگی کازوے کو ٹریفک کیلئے مکمل طور پر بند کردیا گیا ہے۔