انٹرنیٹ پر ویسے تو آئے روز دلچسپ ویڈیوز اور تصاویر وائرل ہوتی ہیں مگر حال ہی میں شیئر ہونے والی ایک ویڈیو نے صارفین کو ہنسا ہنسا کر لوٹ پوٹ کردیا۔
انگریزی وہ زبان جو عالمی سطح پر نہ صرف بولی جاتی ہے بلکہ اجنبی آپس میں ایک دوسرے سے بات چیت کے لیے بھی انگلش کا ہی استعمال کرتے ہیں۔
بعض اوقات جن لوگوں کی انگریزی کمزور ہو انہیں مشکلات کا سامنا بھی کرنا پڑتا ہے کیونکہ وہ اپنی بات سامنے والے کو سمجھا نہیں پاتے اور خصوصاً یہ گفتگو اگر ٹیلی فون پر ہورہی ہو تو سمجھانا ایک مشکل ترین مرحلہ ہوتا ہے۔
انٹرنیٹ پر وائرل ہونے والی ویڈیو دراصل ایک عربی شخص کی ہے جس کی انگریزی کمزور ہے۔ سماجی رابطے کی ویب سائٹ پر شیئرکردہ ویڈیو دیکھ کر صارفین ہنس ہنس کر لوٹ پوٹ ہوگئے۔
ویڈیو میں دیکھا جاسکتا ہے کہ ہوٹل میں مقیم شخص جو لہجے سے عربی بولنے والا معلوم ہورہا ہے، انتظامیہ کو سمجھانے کی کوشش کررہا تھا کہ اُس کے کمرے میں چوہا داخل ہوگیا۔
مذکورہ شخص نے اس کال کی ویڈیو خود ہی بنائی، انہوں نے استقبالیہ پر کال کر کے صورتحال دلچسپ انداز سے بتائی۔
استتقبالیہ پر موجود کارکن نے کال اٹھائی اور پوچھا میں آپ کی کیا مدد کرسکتا ہوں؟، یہ بات سُن کر کال کرنے والے نے کہا ’آپ نے ٹوم اینڈ جیری کا نام سُنا ہے؟ میرے کمرے میں جیری آگیا لہذا آپ ٹوم لے کر آجائیں‘۔
This Arab guy calls the hotel reception to complain about a mouse in his room. Listen to how he describes the situation 💀💀💀😂😂😂 pic.twitter.com/feObtAj9Bp
— Arab Brincess (@Ella_7991) January 17, 2020
کالر دراصل سمجھانا چاہ رہا تھا کہ میرے کمرے میں چوہا داخل ہوگیا اور آپ اسے بھگانے کے اقدامات کریں، چاہیں تو بلی ہی لے کر آجائیں تاکہ میں آرام سے رہ سکوں۔ عرب شخص نے استقبالیہ پر موجود کارکن کو یہ بھی بولا کہ جب آپ ٹوم کو لے کر آئیں گے تو وہ جیری کو آرام سے پکڑ لے گی۔
