کولکتہ : مغربی بنگال میں بیٹی کو چھیڑنے سے منع کرنے پر سفاک ملزمان نے باپ کو بہیمانہ تشدد کرکے موت کے گھاٹ اتار دیا، پولیس نے دو ملزمان کیخلاف مقدمہ درج کرلیا۔
تفصیلات کے مطابق مغربی بنگال کے ہاوڑہ ضلع میں ایک 35 سالہ شخص کو دو مقامی نوجوانوں نے اس وقت تشدد کرکے مار ڈالا جب اس نے انہیں اپنی نابالغ بیٹی کے ساتھ چھیڑ چھاڑ سے روکنے کی کوشش کی۔
بھارتی میڈیا کے مطابق پولیس نے دونوں ملزمان میں سے ایک کو گرفتارکر لیا ہے جبکہ دوسرا ملزم فرار ہونے میں کامیاب ہوگیا دونوں ملزمان سگے بھائی بتائے جارہے ہیں۔
پولیس کے مطابق گزشتہ شام میٹرک کی طالبہ ٹیوشن کلاس سے گھر واپس آ رہی تھی کہ راستے میں کھڑے دو ملزمان نے اسے روکا اور اس کے ساتھ ذیادتی کرنے کی کوشش کی۔
اطلاع ملتے ہی بچی کا باپ موقع پر پہنچ گیا اور ملزمان کو برا بھلا کہتے ہوئے اس کی سرزنش کی اس دوران تلخ کلامی کے بعد مزاحمت کرنے پر دونوں ملزمان نے اس پر بےپناہ تشدد کیا اور زمین پر گرا کر مسلسل مارتے رہے۔
زخمی کے سر سے زیادہ خون بہہ رہا تھا جس کے بعد ملزمان اسے وہیں چھوڑ کر موقع واردات سے فرار ہو گئے۔ زخمی کو طبی امداد کیلیے اسپتال لے جایا گیا جہاں دوران علاج اس نے دم توڑ دیا۔
مقامی پولیس حکام کا کہنا ہے کہ مقدمے میں قتل کے الزامات کے ساتھ بچوں کے تحفظ سے متعلق جنسی جرائم ایکٹ کی مختلف دفعات بھی شامل کی گئی ہیں۔