کراچی: شہر قائد میں تیزاب گردی کا ایک اور واقعہ پیش آیا ہے، کورنگی چکرا گوٹھ میں شوہر نے بیوی پر تیزاب پھینک دیا۔
تفصیلات کے مطابق کراچی میں تیزاب گردی کا ایک اور واقعہ سامنے آگیا، کورنگی چکرا گوٹھ میں شوہر نے بیوی پر تیزاب پھینک دیا، متاثرہ خاتون کی شناخت عابدہ کے نا سے ہوئی۔
رسیکیو ذرائع کا کہنا ہے کہ خاتون کو طبی امداد کے لیے اسپتال منتقل کردیا گیا ہے۔
واضح رہے کہ اس سے قبل کلفٹن میں شوہر کے ہاتھوں بیوی پر تیزاب پھینکنے کا واقعہ پیش آیا تھا، تیزاب گردی کا شکار رقیہ سول اسپتال میں دم توڑ گئی تھی۔
اسپتال انتظامیہ کے مطابق رقیہ 20 روز سے سول اسپتال میں زیر علاج تھی، رقیہ کی لاش لواحقین کے حوالے کردی گئی۔
مزید پڑھیں: تیزاب گردی قتل سے بڑا جرم ہے اور سزا عمرقید ہے ،چیف جسٹس
مقتولہ رقیہ کے لواحقین کا کہنا ہے کہ رقیہ کی لاش کو تدفین کے لیے بہاولپور لے جارہے ہیں، رقیہ پر اس کے شوہر عمران نے جولائی کو تیزاب پھینکا تھا۔
لواحقین کا کہنا ہے کہ ملزم نے دو ہزار روپے نہ دینے پر اہلیہ پر تیزاب پھینکا تھا، ملزم کے خلاف تیزاب گردی، دہشت گردی دفعات کے تحت مقدمہ درج ہے۔
واضح رہے کہ شوہر یا سسرال والوں کی جانب سے خواتین پر تیزاب گردی کا سلسلہ تھم نہ سکا ہے اس سے قبل اس طرح کے متعدد واقعات رونما ہوچکے ہیں۔
یاد رہے کہ تیزاب گردی پر معروف فلمساز شرمین عبید چنائے نے ’سیونگ فیس‘ کے نام سے فلم بنائی تھی جس کو آسکر ایوارڈ دیا گیا تھا۔
