بھارت کے دارالحکومت نئی دہلی میں افسوسناک واقعہ پیش آیا جہاں سفاک باپ نے جواں سال بیٹے کو دُلہا بننے سے چند گھنٹے قبل موت کے گھاٹ اتار دیا۔
میڈیا رپورٹس کے مطابق مقبول کی شناخت 29 سالہ جم ٹرینر گورو سنگھل کے نام سے ہوئی جسے اس کے باپ رنگلال نے 15 مرتبہ چاقو گھونپ کر قتل کیا اور کئی دنوں تک روپوش رہا۔
پولیس حکام کے مطابق باپ بیٹے کے درمیان تعلقات خراب تھے، ملزم اپنی پسند کی ہوئی لڑکی کے ساتھ مقتول کی شادی کروانا چاہتا تھا، بیٹے کے منع کرنے کے باوجود شادی طے کی گئی جس پر آئے روز دونوں میں جھگڑا ہوتا تھا۔
متعلقہ: شادی کی پیشکش ٹھکرانے پر لڑکے نے لڑکی کو کلہاڑی سے قتل کر دیا
پولیس نے بتایا کہ 7 مارچ کو شادی کی تقریب سے چند گھنٹے قبل باپ بیٹے میں جھگڑا ہوا، گورو سنگھل کو رنگلال نے چاقو سے قتل کیا اور فرار ہوگیا۔ ملزم نے جے پور پہنچ کر گھر والوں سے رابطہ کیا جس کے بعد پولیس نے اسے ٹریس کر کے گرفتار کیا۔
ملزم نے دورانِ تفتیش قتل کا اعتراف کیا اور کہا کہ مجھے اس پر کوئی پچھتاوا نہیں ہے، مجھے یہ کام پہلے ہی کر دینا چاہیے تھا۔
پولیس نے معاملے کی مزید تحقیقات کا آغاز کر دیا اور ملزم سے پوچھ گچھ کی جا رہی ہے۔ ملزم کے چھوٹے بھائی کو بھی حراست میں رکھا گیا ہے۔
