کراچی : کوئٹہ جلسے میں مریم نوازکو بلوچی چادر پیش کرنے والا کرمنل نکلا، علی حسن بروہی کے خلاف کئی ایف آئی آرز درج ہیں اور وہ گرفتار بھی ہوچکا ہے۔
تفصیلات کے مطابق پی ڈی ایم کے کوئٹہ جلسے میں مریم نواز کو چادر پیش کرنے والا علی حسن بروہی کرمنل نکلا، ملزم علی حسن بروہی کے خلاف کراچی کے تھانہ سہراب گوٹھ میں مقدمہ درج ہے۔
علی حسن بروہی کے خلاف ڈپٹی کمشنر ویسٹ نے بھی اعلیٰ حکام کو شکایت اور عوام کو خبردار کیا تھا،ملزم زمینوں پر قبضے اور اربوں روپے کی کرپشن میں ملوث ہے۔
ذرائع کا کہنا ہے کہ علی حسن بروہی اور اس کے ساتھیوں پر دوماہ قبل محکمہ اینٹی انکروچمنٹ کی جانب سے بیس ایکڑ سے زائد زمین پر قبضہ کرنے پر مقدمہ درج کیا گیا جبکہ ملزم ضلع ویسٹ کی تین ہزار ایکڑ زمین پر قابض ہے۔
خیال رہے گذشتہ روز بلوچستان کے دارالحکومت کوئٹہ میں حکومت کے خلاف اپوزیشن جماعتوں نے کوئٹہ میں سیاسی قوت کا مظاہرہ، کیا تھا ، جلسے سے مریم نواز ، پیپلز پارٹی کی چیئرپرسن بلاول بھٹو زرداری ، جے یو آئی (ف) کے سربراہ مولانا فضل الرحمن اور دیگر اپوزیشن رہنماؤں نے خطاب کیا۔
کوئٹہ میں سیکیورٹی خدشات کی وجہ سے موبائل فون سروس رات نو بجے تک کیلئے بند کردی گئی تھی جبکہ ڈبل سواری پر بھی ایک دن کیلئے پابندی لگادی گئی تھی۔
