ریاض: سعودی عرب میں آم کی پیداوار میں خاطر خواہ اضافہ ہو گیا ہے، سالانہ پیداوار 88 ہزار ٹن تک پہنچ گئی۔
عرب نیوز کے مطابق سعودی عرب میں آم کی پیداوار 60 فی صد ہو گئی ہے، ویژن 2030 کے تحت سعودی عرب 6 ہزار 880 ہیکٹرز رقبے پر آم کی کاشت کر رہا ہے۔
آم کی پیداوار، فوڈ سیکیورٹی اور پیداوار کی شرح میں اضافے کے لیے سعودی وزارت ماحولیات، پانی و زراعت تندہی سے کام کر رہی ہے، وزارت کا کہنا ہے کہ آم جیسے موسمی پھلوں کی پیداوار سے مملکت کو معاشی فائدہ ہو رہا ہے۔
واضح رہے کہ آم کی فصل سعودی عرب کے کئی علاقوں میں کاشت کی جاتی ہے، آم کا سیزن اپریل سے اگست تک ہوتا ہے اور آم کی 20 سے زائد اقسام پیدا کی جاتی ہیں، جن میں اویش، سکری اور ٹومی ایٹکنز بھی شامل ہیں۔
وزارت ماحولیات کے مطابق 2005 میں سعودی عرب میں آم کے اڑھائی لاکھ درخت تھے جن سے آم کی سالانہ پیداوار 18 ہزار ٹن تک ہوتی تھی، 2022 میں آم کے درختوں کی تعداد 10 لاکھ تک پہنچ گئی جن سے آم کی پیداوار 65 ہزار ٹن ہو گئی۔
سعودی عرب میں پھلوں، مچھلی، لائیو اسٹاک اور عربی کافی کی پیداوار اور مارکیٹنگ میں اضافے کے لیے سعودی فرماں روا شاہ سلمان نے 2019 میں ’سسٹین ایبل ایگریکلچر رورل ڈیویلپمنٹ پروگرام‘ کا افتتاح کیا تھا۔
