کراچی : پاکستان پیپلزپارٹی کے سینئر رہنما و مشیرزراعت منظوروسان نے عمران خان کو مشورہ دیتے ہوئے کہا کہ خان صاحب جیل بھرو تحریک تم سے نہیں ہوپائے گی، اب پھانسی لگاوٴ تحریک شروع کرو۔
تفصیلات کے مطابق پاکستان پیپلزپارٹی کے سینئر رہنما و مشیرزراعت منظوروسان نے اپنے بیان میں کہا کہ جیل بھروتحریک دراصل عمران، گوگی،بزدرار بچاوٴ تحریک ہے،جیل بھروتحریک سے پہلے عمران خان اور شیخ رشید نے کہاتھا کہ سب سے پہلے گرفتاری وہ دیں گے۔
پیپلزپارٹی کے سینئر رہنما کا کہنا تھا کہ گزشتہ روز شیخ رشید سسرال جانے کی بجائے اپنی گاڑی میں بیٹھ کر پتلی گلی سے بھاگ کر گھر روانہ ہوگئے اور عمران خان گرفتاری دینے کے بجائے خود عدالتوں سے ضمانت لیکر ٹانگ پر جعلی پلستر لگواکر چھپ کر بیٹھا ہے۔
منظوروسان کا کہنا تھا کہ عمران خان نے جن مقاصد کے لئے جیل بھرو تحریک شروع کی وہ مقاصدکبھی کامیاب نہیں ہوں گے۔
انھوں نے عمران خان کو مشورہ دیتے ہوئے کہا کہ خان صاحب جیل بھرو تحریک تم سے نہیں ہوپائے گی، اب پھانسی لگاوٴ تحریک شروع کرو۔
مشیرزراعت سندھ کا کہنا تھا کہ عمران خان کی جیل بھروتحریک فلاپ تحریک بن چکی ہے، چند کارکنان کے سوا کوئی گرفتاری دینے نہیں نکلا،جن رہنماوٴں نے گرفتاریاں دی ہیں وہ ضمانتوں کیلئے اب درخواستیں دینے والے ہیں۔
انھوں نے تنقید کرتے ہوئے کہا خان صاحب جیل بھرو تحریک میں آپکے بیٹے قاسم و سلیمان، بشری بی بی، فرح گوگی اور علیمہ باجی کہیں نظر نہیں آرہے۔
