کراچی : مشیر زراعت منظور وسان نے عمران خان کے حوالے سے پیش گوئی کرتے ہوئے کہا آئندہ انتخابات میں عمران خان نظر نہیں آتے ، جو اقتدار سے جاتا ہے وہ جلدی واپس نہیں آتا ، انتظار کرنا پڑے گا۔
تفصیلات کے مطابق سیاسی پیشگوئیوں کے حوالے سے شہرت رکھنے والے پاکستان پیپلز پارٹی کے رہنما منظور وسان نے پیشگوئی کی ہے کہ عمران خان آئندہ انتخابات میں مجھے نظر نہیں آرہے۔
منظور وسان کا کہنا تھا کہ جو اقتدار سے جاتا ہے وہ جلدی واپس نہیں آتا ، اب عمران خان کو انتظار کرنا پڑے گا ، عمران خان کی مقبولیت میں آہستہ آہستہ کمی ہوتی جائے گی کیونکہ جو موقع عمران خان کو دیا گیا وہ اس سے کچھ حاصل نہ کر سکے۔
پیپلز پارٹی رہنما نے کہا کہ عمران خان کا لانگ مارچ غلط فیصلوں کی وجہ سے ناکام ہوا، اب ان کے ساتھی بھی جولائی میں ساتھ چھوڑ کر چلے جائیں گے۔
آئندہ انتخابات کے حوالے سے ان کا کہنا تھا کہ 2023میں بلاول بھٹو یا ن لیگ سے وزیراعظم بننے کا امکان ہے، اتحاد بھی ہوسکتا ہے، ملک میں عام انتخابات اپریل 2023میں ہوتے دیکھ رہا ہوں۔
منظور وسان نے مزید کہا کہ پی ٹی آئی اور جی ڈی اے کے خلاف کرپشن کیسزکی انکوائری کر کے پھر نیب قانون لایا جاتا ، پانی کے معاملے پر سندھ کےساتھ زیادتی ہورہی ہے،کپاس اور گنا جل رہا ہے۔
