پشاور: مردان میں گودام سے گندم کے ناقص اور جعلی بیج کا ذخیرہ برآمد ہوا ہے۔
تفصیلات کے مطابق خیبر پختونخوا میں کسانوں کو ناقص بیج فروخت کرنےکا بڑا اسکینڈل سامنے آ گیا ہے، ریجنل سیڈ رجسٹریشن ڈپارٹمنٹ نے مردان میں گودام سے گندم کے ناقص اور جعلی بیج کا ذخیرہ برآمد ہونے پر محکمہ زراعت کو ایک مراسلہ بھیجا ہے۔
ریجنل سیڈ رجسٹریشن ڈپارٹمنٹ نے مراسلے میں استفسار کیا ہے کہ سرکاری سیڈ انڈسٹری کے پرنٹ شدہ بیگ نجی گودام تک کیسے پہنچے؟ ڈائریکٹر سید عنایت اللہ کا کہنا تھا کہ ناقص بیج کے باعث فوڈ سیکیورٹی کا مسئلہ پیدا ہو سکتا ہے۔
سیڈ ڈپارٹمنٹ کی جانب سے محکمہ زراعت میں سہولت کاروں کی نشان دہی اور حقائق جاننے کے لیے انکوائری کا مطالبہ کیا گیا ہے، مراسلے میں کہا گیا کہ ملزمان سیڈ انڈسٹری کے پرنٹ شدہ بیگز میں عام گندم بھر کر فروخت کر رہے تھے، اور گودام سے غیر تصدیق شدہ گندم کی 38 بوریاں اور ہزار سے زائد بیگز برآمد کیے گئے ہیں۔
