مردان: خیبر پختون خوان کے شہر مردان میں بھی ایک گھر کے کمرے کی چھت گرنے سے 3 خواتین دب کر جاں بحق ہو گئیں۔
تفصیلات کے مطابق مردان میں تخت بھائی کے علاقے میں کمرے کی چھت گر گئی، جس کے ملبے تلے دب کر 3 خواتین جاں بحق اور 3 زخمی ہو گئیں۔
ریسکیو اہل کاروں نے ملبے تلے دبے افراد کو نکال کر اسپتال منتقل کر دیا، مون سون بارشوں کے دوران چھت گرنے کے واقعات میں 8 افراد جاں بحق ہو چکے ہیں۔
ادھر جہلم میں بھی رات گئے طوفانی بارش سے 4 مختلف علاقوں میں گھروں کی چھتیں گر گئیں، جن کے ملبے تلے دب کر 9 سالہ بچی جاں بحق، اور خاتون سمیت 3 افراد زخمی ہو گئے، چھتیں گرنے کے واقعات کھیوڑہ اور جلالپور شریف میں پیش آئے۔
راولاکوٹ میں مکان کی چھت گر گئی، ملبے تلے دبنے سے 10 افراد جاں بحق
واضح رہے کہ راولاکوٹ کے علاقے تتہ پانی کے مقام پر بھی شدید بارشوں کی وجہ سے ایک مکان کی چھت گر گئی ہے، جس کے ملبے تلے دب کر 10 افراد جاں بحق ہو گئے۔
ریسکیو حکام کا کہنا تھا کہ جاں بحق افراد میں 7 بچے اور 3 خواتین شامل ہیں، متاثرہ مکان میں 2 خاندان رہائش پذیر تھے، جب کہ حادثے کے وقت کچھ مہمان بھی گھر میں موجود تھے۔
