آپ نے انگریزی فلموں میں سپرمین، اسپائیڈر مین، آئرن مین اور کیپٹن امریکا جیسے مشہور کردار دیکھے ہوں گے جو دیکھنے میں اصل کرداروں جیسے دکھائی دیتے ہیں۔
لیکن ایسا ہرگز نہیں ہے، درحقیقت ان کرداروں کو کمپیٹرائزڈ طریقے سے تخلیق کیا جاتا ہے جسے وی ایف ایکس آرٹ کہا جاتا ہے۔
پاکستان میں وی ایف ایکس آرٹ کے ذریعے "مارول سیریز "کے کرداروں کو حقیقت کا روپ دینے والا ایک ایسا نوجوان بھی ہے جس نے اپنی محنت اور لگن سے یہ کامیابی حاصل کی۔
سندھ کے شہر لاڑکانہ سے تعلق رکھنے والے سہیل خان نے اے آر اوائی نیوز سے خصوصی گفتگو کرتے ہوئے اپنی اس کامیابی کے بارے میں تفصیل سے آگاہ کیا۔
سہیل خان نے بتایا کہ مجھے مارول سیریز بچپن سے ہی بےحد پسند ہیں اسی شوق کی وجہ سے آج میری ویڈیوز کو لوگ بہت لائیک کرتے ہیں جس سے میری حوصلہ افزائی ہوتی ہے۔
انہوں نے بتایا کہ میں نے کسی استاد سے باقاعدہ تربیت حاصل نہیں کی اور نہ ہی کسی ٹریننگ سینٹر میں پڑھا، صرف یو ٹیوب دیکھ کر ہی ویڈیوز بنانا سیکھا۔
سہیل خان نے کہا کہ میرے علاوہ اس ملک میں بہت سے وی ایف ایکس آرٹسٹ ہوں گے جو ابھی تک منظر عام پر نہیں آئے میری درخواست ہے کہ ایسے ہنرمند نوجوانوں کو حکومتی سطح پر پذیرائی ملنی چاہیے تاکہ ان کی حوصلہ افزائی ہو۔
