اسلام آباد : وزیراعظم نوازشریف کی صاحبزادی مریم نواز کا کہنا ہے کہ عوام لوڈ شیڈنگ کے بارے میں بتائیں کہ کوئی بہتری آئی ہے۔
تفصیلات کے مطابق وزیراعظم نوازشریف کی صاحبزادی مریم نواز نے سماجی رابطے کی ویب سائٹ ٹویٹر پر پیغام میں کہا کہ عوام لوڈ شیڈنگ کے بارے میں بتائیں کہ کوئی بہتری آئی ہے، کتنے گھنٹے لوڈ شیڈنگ ہورہی ہے، ضلع اور نام کے ساتھ بتائیں۔
Load shedding gotten any better ? Number of hours, district area name pls.
— Maryam Nawaz Sharif (@MaryamNSharif) April 21, 2017
مزید پڑھیں : لوڈشیڈنگ سے نجات حاصل کرنی ہے تو ٹوئٹر کا استعمال سیکھیں، مریم نواز
یاد رہے اس سے قبل بھی وزیراعظم نواز شریف کی صاحبزادی مریم نواز شریف نے لوڈ شیڈنگ کے حوالے سے ٹوئیٹر پر مہم شروع کی، اس حوالے سے انہوں نے سوشل میڈیا پر پیغام جاری کیا تھا کہ جہاں زیادہ لوڈشیڈنگ ہورہی ہے تو ٹوئٹر پر آگاہ کریں۔
Load shedding update with your area/district name, please.
— Maryam Nawaz Sharif (@MaryamNSharif) April 11, 2017
مریم نواز نے عوام سے بجلی کی لوڈشیڈنگ کی تفصیلات مانگی تھی اور کہا تھا کہ اپنے علاقے میں لوڈ شیڈنگ کے حوالے سے انھیں آگاہ کریں، شکایت کنندہ اپنے شہر اور ضلع کا نام بھی ضرور لکھیں۔
جس کے بعد ملک بھر میں بجلی کی لوڈ شیڈنگ کے بعد عوام نے اپنے شدید ردعمل کا اظہار کیا اور سوشل میڈیا پر حکمرانوں کواپنی تنقید کا نشانہ بناتے ہوئے خوب پوسٹنگ کی جارہی ہے ’’مریم لائٹ چلی گئی‘‘ #MaryamLightChaliGai سوشل میڈیا کا ٹاپ ٹرینڈ بن گیا۔
واضح رہے کہ ملک میں گرمی کی شدت میں اضافہ ہوتے ہی لوڈشیڈنگ کا جن بھی بے قابو ہوگیا ہے اوربجلی کا شارٹ فال تجاوز کرتے ہوئے تین ہزار میگا واٹ تک پہنچ گیا ہے۔