واشنگٹن: امریکی وزیر دفاع جیمز میٹس نے کہا ہے کہ 40 سال افغان جنگ کے لیے بہت ہیں اب افغان امن معاملے پر سب کو شریک کرنے کا وقت آگیا ہے۔
غیرملکی خبررساں ادارے کے مطابق پینٹاگون میں امریکی وزیر دفاع جیمز میٹس نے بھارتی ہم منصب سے ملاقات سے قبل صحافیوں سے گفتگو کرتے ہوئے کہا کہ افغان جنگ کو 40 سال ہوگئے، 40 سال بہت ہوتے ہیں اب وقت ہے کہ افغان امن کے سلسلے میں اقوام متحدہ، بھارتی، افغان زیراعظم سے تعاون کیا جائے۔
امریکی وزیر دفاع نے کہا کہ برصغیر، افغانستان میں امن کی بحالی کے لیے تمام ممالک سے بھی تعاون کیا جائے جو دنیا کو بہتر بنانے کے لیے امن کے قیام کی کوششیں کررہے ہیں۔
جیمز میٹس نے کہا کہ افغان امن کے سلسلے میں ٹریک پر ہیں، افغان عوام کے تحفظ کے لیے اپنی بہترین کوششیں کریں گے، افغان جنگ کے خاتمے کے لیے سفارتی کوششیں جاری رکھیں گے۔
مزید پڑھیں: قریشی، زلمے ملاقات، افغانستان سے متعلق تعاون جاری رکھنے پر اتفاق
واضح رہے کہ امریکی نمائندہ خصوصی برائے افغانستان آج پاکستان کے دورے پر پہنچے جہاں انہوں نے وزیر خارجہ شاہ محمود قریشی سے ملاقات کی، زلمے خلیل زاد نے شاہ محمود قریشی کو افغانستان میں مفاہمتی عمل کی تفصیلات سے آگاہ کیا۔
شاہ محمودقریشی کا کہنا تھا کہ افغانستان کا امن پاکستان کے بہترین مفاد میں ہے، وزیراعظم نے افغان مصالحتی عمل کے لئے ٹرمپ کے پیغام کا خیرمقدم کیا ہے.
