دوحہ : جمیعت علما اسلام کے سربراہ مولانا فضل الرحمان نے حماس رہنماؤں کو ہر قسم کے تعاون کی یقین دہانی کرادی۔
تفصیلات کے مطابق سربراہ جے یو آئی مولانا فضل الرحمان وفد کے ہمراہ قطر پہنچ گئے ، ترجمان جے یوآئی نے بتایا کہ مولانا کی حماس رہنماؤں سے ملاقات ہوئی۔
وفد نے فضل الرحمان کی قیادت میں حماس کی مجلس شوریٰ سے ملاقات کی، ترجمان اسلم غوری کا کہنا تھا کہ حماس کی مجلس شوریٰ کے سربراہ ابو عمر وفد کی قیادت کررہے تھے، ملاقات میں غزہ و فلسطین کی تازہ صورتحال پر تبادلہ خیال کیا گیا۔
اسلم غوری نے بتایا کہ فضل الرحمان نے حماس رہنماؤں کو ہر قسم کے تعاون کی یقین دہانی کراتے ہوئے کہا کہ فلسطین آزادریاست ہے،اسرائیلی قبضے کی حمایت نہیں کی جاسکتی، مسجداقصیٰ اور فلسطینیوں کی آزادی کی جدوجہد کی حمایت کرتے ہیں۔
سربراہ مجلس شوریٰ حماس ابو عمر نے جے یو آئی کے سربراہ کے تعاون پر شکریہ ادا کرتے ہوئے کہا سربراہ اور جے یو آئی امت مسلمہ کی طرف سے فرض کفایہ ادا کر رہی ہے، گھروں کی تعمیر، خیموں، دواؤں، رمضان میں سحر و افطار کیلئے تعاون کی اپیل کرتے ہیں۔
جے یو آئی کے سربراہ نے پاکستانی عوام سے اپیل کی کہ وہ بھرپور تعاون کریں۔
