سعودی عرب کے محکمہ موسمیات کا کہنا ہے کہ آج جمعرات کو ریاض اور مشرقی ریجن کے علاوہ قصیم، حائل اور شمالی حدود ریجن میں گرد وغبار کا امکان ہے۔
سعودی خبر رساں ادارے کی رپورٹ کے مطابق سعودی عرب کے محکمہ موسمیات کا کہنا ہے کہ مکہ مکرمہ ریجن کے شہروں میں بھی تیز ہوائیں چلنے کا امکان ہے۔
محکمے کے مطابق گرد وغبار کے طوفان سے تبوک، مدینہ منورہ اور مکہ مکرمہ کے بعض شہر بھی متاثر ہوں گے، اس کے علاوہ بحرہ اور اللیث میں 59 کلو میٹر فی گھنٹہ کی رفتار سے تیز ہوائیں چل سکتی ہیں۔
اس سے قرب وجوار کے شہر بھی متاثر ہوسکتے ہیں جبکہ اس کی تاثیر جدہ کے بعض محلوں میں بھی محسوس کی جائے گی۔
محکمے کے مطابق جازان، عسیر اور الباحہ کے بالائی علاقوں میں مطلع ابر آلود رہے گا جبکہ ہلکی بارش کا امکان ہوگا۔
بحیرہ احمر میں شمالی اور شمال مغربی ہوائیں چلنے کا امکان ہے، جس کی رفتار 45 کلو میٹر فی گھنٹہ ہوسکتی ہے اور اس سے ڈیڑھ سے دو میٹر اونچی موجیں اٹھیں گی۔
خلیج عربی کے سمندر میں رات کو شمالی اور دن کو شمال شرقی ہوا چلے گی اور اس کی رفتار 36 کلو میٹر فی گھنٹہ ہوسکتی ہے۔
دوسری جانب پاکستان میں محکمہ موسمیات نے کراچی کے شہریوں کو آج سے ہیٹ ویو کے خطرے سے خبردار کردیا، گرمی کی لہر 20 مئی تک جاری رہ سکتی ہے۔
تفصیلات کے مطابق محکمہ موسمیات نے ہیٹ ویو الرٹ جاری کردیا، جس میں کہا ہے کہ ملک کے بیشتر حصوں میں پندرہ مئی سے ہیٹ ویو کا امکان ہے.
الرٹ میں کہا گیا کہ۔جنوبی پنجاب،سندھ اور بلوچستان میں درجہ حرارت معمول سے چار سے چھ ڈگری زیادہ رہنے کی توقع ہے جبکہ بالائی
پنجاب، خیبرپختونخوا، کشمیر اور گلگت بلتستان میں درجہ حرارت پانچ سے سات ڈگری زیادہ رہنے کا امکان ہے۔
گرمی کے موسم میں دانوں کی مشکل کیسے دور ہو؟
شددید گرمی کی لہرپندرہ سے بیس مئی تک جاری رہنے کا امکان ہے جبکہ انیس اور بیس مئی کو کشمیر، اسلام آباد، گلگت بلتستان میں بارش اور ژالہ باری کی بھی پیش گوئی کی گئی ہے۔
اس کے علاوہ بالائی علاقوں میں درجہ حرارت بڑھنے سے برف پگھلنے کی رفتار تیز ہونے کا بھی خدشہ ہے۔
