لاہور: لاہور ہائیکورٹ نے ادویات کی قیمتوں کے تعین کا نوٹیفکیشن معطل کر دیا ہے۔
تفصیلات کے مطابق محمد اسلم کی جانب سے لاہور ہائیکورٹ میں درخواست دائر کی گئی تھی جس میں مؤقف اختیار کیا گیا تھا کہ ادویات کی قیمتیں مقررکرنے کے لیے نگراں حکومت نے قانون کے منافی نوٹیفکیشن جاری کیا ہے۔
درخواست گزار کا کہنا تھا کہ حکومت ادویات کی قیمتیں مقرر کرنے کی سیکشن ڈرگ ایکٹ سے نکال رہی ہے، نگراں حکومت کے پاس یہ اختیار نہیں ہے، عوامی اور جمہوری حکومت یہ اقدام کر سکتی ہے۔
درخواست میں استدعا کی گئی ہے کہ عدالت درخواست کے حتمی فیصلے تک نوٹیفکیشن معطل کرنے کا حکم دے، کیس کی سماعت کے بعد عدالت نے وفاقی حکومت سمیت دیگر فریقین سے جواب طلب کرتے ہوئے نوٹیفکیشن معطل کر دیا۔
حکومت نے جان بچانے والی 146 ادویات کی قیمتوں میں اضافہ کردیا
واضح رہے کہ گزشتہ روز نگراں حکومت نے جان بچانے والی نیشنل اسینشل میڈیسنز (WHO) لسٹ 146 ادویات کی قیمتیں بڑھا دی ہیں، جن ادویات کی قیمتیں بڑھائی گئی ہیں ان میں کینسر، ویکسین اور اینٹی بائیوٹک دوائیں شامل ہیں، ذرائع کا کہنا تھا کہ ڈریپ نے حکومت کو 262 ادویات کی قیمتیں بڑھانے کی سمری بھیجی تھی، جس پر حکومت نے لسٹ میں شامل جان بچانے والی 146 ادویات کی قیمتوں میں اضافہ کر دیا۔
لسٹ میں شامل 116 ادویات کی قیمتیں فارماسیوٹیکل کمپنیاں از خود بڑھائیں گی، اور حکومت اب صرف نیشنل اسینشل میڈیسنز لسٹ میں شامل صرف 200 ادویات کی قیمتوں پر کنٹرول رکھے گی، باقی ادویات پر ڈسٹری بیوٹر اور مینوفیکچرر اپنی مرضی سے قیمتوں کا تعین کریں گے۔
