پاکستان شوبز انڈسٹری کی سینئر اداکارہ میرا نے کہا ہے کہ بہت چھوٹی عمر سے شوبز میں قدم میں رکھا تھا۔ ’9 سال کی عمر میں جب میرا پہلا اشتہار نشر ہوا تو اس میں سے مجھے نکال کر کسی اور کو کاسٹ کر لیا گیا۔
سینئر اداکارہ میرا ایک پوڈ کاسٹ میں شریک ہوئیں جہاں انہوں نے اپنے چاہنے والوں کو اپنی زندگی میں پیش آئے عروج و زوال سے متعلق آگاہ کیا۔
اداکارہ کا کہنا تھا کہ ’میں نے 9 سال کی عمر میں پہلا اشتہار کیا تھا، یہ بچوں کا اشتہار تھا جس کے لیے میری تصاویر لی گئیں، لیکن جب شوٹنگ مکمل ہوئی اور اشتہار نشر ہوا تو میں کہیں نظر نہیں آ رہی تھی‘۔
میرا نے بتایا کہ ’اشتہار سے نکالنے کی وجہ یہ تھی کہ چہرے کے خدوخال کے باعث کیمرے کے سامنے 9 کے بجائے 20 سال کی لگ رہی تھی، بعد ازاں اشتہار میں میرا کردار کسی اور کو دے دیا گیا تھا۔‘
انہوں نے کہا کہ اب لگتا ہے کہ مجھے کوئی ایکشن فلم کرنی چاہیے، میرے حوالے سے میڈیا پر بہت سی خبریں گردش کرتی رہتی ہیں، شاید یہ ’میرا‘ ہونے کی سزا ہے جو مجھے دی جاتی ہے۔
انہوں نے کہا کہ ’بھارتی فلمساز مہیش بھٹ کی فلم ’شہرت‘ میں کام مل گیا تھا، لیکن پاکستان اور بھارت کے درمیان تعلقات کی وجہ سے کام رُک گیا تھا، یہ میری زندگی کی بہترین فلم بننے جارہی تھی، لیکن دونوں ممالک کے سیاسی تنازعات اس کی راہ میں رکاوٹ بن گئے۔
میرا نے کہا کہ ریکھا اور مادھوری ڈکشٹ بہترین اداکارائیں ہیں اور وہ انہیں بیحد پسند کرتی ہیں۔ ریکھا جی نے مجھے بہت متاثر کیا ہے، وہ میرے لیے مثالی شخصیت ہیں، انہوں نے کہا کہ مادھوری کی شخصیت بھی بہت باکمال ہے۔
