لاڑکانہ: پاکستان پیپلز پارٹی کے چیئرمین بلاول بھٹو زرداری اور پاکستان مسلم لیگ ن کی نائب صدر مریم نواز کی ملاقات کی اندرونی کہانی سامنے آ گئی۔
اے آر وائی نیوز کے مطابق بے نظیر بھٹو کی برسی کے موقع پر جلسے میں شرکت کے لیے ن لیگ کی نائب صدر مریم نواز گڑھی خدا بخش آئی تھیں، آج مریم نواز نے پی پی رہنماؤں کے مزارت پر حاضری بھی دی اور بلاول بھٹو کے ساتھ ان کی اہم ملاقات ہوئی۔
اس ملاقات میں دونوں رہنماؤں کے درمیان متعدد نکات پر اتفاق رائے ہوا، انھوں نے اتفاق کیا کہ ن لیگ اور پیپلز پارٹی ایک دوسرے کے خلاف محاذ آرائی نہیں کریں گی۔
بلاول اور مریم نواز اس بات پر بھی متفق تھے کہ انتخابی میدان خالی نہیں چھوڑا جائے گا، ن لیگ اور پی پی ضمنی انتخابات میں حصہ لے گی، تاہم ضمنی انتخاب سے متعلق حتمی فیصلہ پی ڈی ایم اجلاس میں ہوگا۔
بلاول بھٹو نے مریم نواز کی گاڑی خود ڈرائیو کی، مزارات پر حاضری
واضح رہے آج مریم نواز اور بلاول بھٹو زرداری نے ایک ساتھ ذوالفقار علی بھٹو، بے نظیر بھٹو اور دیگر پی پی رہنماؤں کے مزارت پر حاضری دی، مریم نواز کو گڑھی خدا بخش پہنچانے والی گاڑی خود بلاول بھٹو نے ڈرائیو کی۔
مریم نواز نے مزارات پر پھول چڑھائے اورفاتحہ خوانی کی، وہ کچھ دیر گڑھی خدا بخش میں موجود رہیں، بلاول بھٹو نے گڑھی خدا بخش کی اہمیت اور پی پی شہدا کی تفصیلات سے مریم نواز کو آگاہ کیا، انھوں نے شہدا گیلری کا بھی دورہ کیا۔
