سری نگر : گرفتار سابق وزیراعلیٰ محبوبہ مفتی کی بیٹی التجا مفتی نے بھارتی وزیرداخلہ کو خط میں کہا کشمیریوں کو جانوروں کی طرح پنجرے میں قید کر دیاگیا ہے ، محبوبہ مفتی سے کسی کو ملنے نہیں دیا جارہاہے، یہ توہین آمیزسلوک ہے۔
تفصیلات کے مطابق مقبوضہ کشمیرکی گرفتار سابق وزیراعلیٰ محبوبہ مفتی کی بیٹی التجا مفتی نے بھارتی وزیرداخلہ امیت شاہ کو خط لکھا ، جس میں کہا کہ کشمیریوں کو جانوروں کی طرح پنجرےمیں قیدکردیاگیاہے، کشمیریوں کوبنیادی انسانی حقوق سےمحروم کردیاگیاہے۔
التجا مفتی کا کہنا تھا کہ محبوبہ مفتی سےکسی کوملنےنہیں دیاجارہاہے، یہ توہین آمیزسلوک ہے۔
یاد رہے چند روز قبل سابق وزیراعلیٰ کی صاحبزادی ثنا مفتی نے اپنی دوست کو آڈیو پیغام بھیجا تھا ، جس میں انہوں نے بتایا کہ وادی کے حالات انتہائی کشیدہ ہیں اور یہاں خوف کا ماحول ہے جبکہ کشمیریوں کے ساتھ بھارتی فوج جانوروں جیسا برتاؤ کررہی ہے۔
مزید پڑھیں : مقبوضہ کشمیر : محبوبہ مفتی کی بیٹی کا آڈیو پیغام سامنے آگیا
ثنا مفتی کا کہنا تھا کہ ’’آرٹیکل 370 ختم ہونے کے بعد کشمیریوں میں اشتعال پایا جارہاہے، البتہ انہیں اپنے جذبات کے اظہار کی اجازت نہیں، میری والدہ کو بھی بلاجواز حراست میں لے لیا گیا، اُن پر تو سخت نظر بندی تھی اب انہیں کسی سے بھی ملنے کی اجازت نہیں ہے‘‘۔
انہوں نے کہا کہ ’’آپ کو اکھنڈ بھارت پر بڑا غرور ہے کیا یہی وہ بھارت ہے جہاں عوام کے حقوق چھینے کے بعد جشن منایا جارہا ہے، بھارت آخر کب تک کشمیریوں کو گھروں میں بند رکھے گا، یہ آوازیں کب تک دبائے گا، جلد ہی اُسے منہ کی کھانی پڑے گی‘‘۔
یاد رہے کہ بھارت نے آرٹیکل 370 اور 35 اے ختم کرنے کے بعد کشمیری قیادت کو نظر بند کردیا ہے، اس ضمن میں سابق وزیر اعلیٰ محبوبہ مفتی اور عمر عبداللہ کو نظر بند کر کے انہیں حراست میں لیا گیا تھا۔
