کراچی: سندھ ہائی کورٹ نے اداکارہ مہوش حیات اور کبریٰ خان کی میجر (ر) عادل فاروق راجہ کے خلاف دائر درخواست پر سماعت 15 اگست تک ملتوی کردی۔
سندھ ہائیکورٹ میں اداکارہ مہوش حیات اور رابعہ اقبال عرف کبریٰ خان کی میجر (ر) عادل فاروق راجہ کے خلاف دائر درخواست کی سماعت ہوئی۔
سماعت کے دروان تفتیشی افسر کے پیش نہ ہونے پر عدالت نے اظہار برہمی کا اظہار کیا۔
اداکارہ کے وکیل خواجہ نوید ایڈوکیٹ نے عدالت میں کہا کہ کاغذی کارروائی کے علاوہ ابھی تک کوئی کارروائی نہیں ہوئی، قابل اعتراض تصاویر اور مواد تاحال نیٹ پر موجود ہے۔
درخواست میں کہا گیا تھا کہ یوٹیوبر سابق فوجی افسر نے میڈیا انڈسٹری کی چار اداکاراوں کے خلاف جھوٹے الزامات لگا کر ان کی تذلیل کی، جھوٹے اور من گھڑت الزامات سے میری اور دیگر اداکاراؤں کی عزت اور وقار کو مجروح کیا گیا۔
درخواست گزار نے مؤقف اپنایا کہ یوٹیوبر عادل فاروق راجہ نے بعد میں ایک اور ویڈیو وضاحت کی اور پہلے والے موقف سے مکر گئے، وکیل نے درخواست میں موقف اختیار کیا کہ اس دوران درخواست گزار سمیت اداکارہ کی ساکھ کو ناقابل تلافی نقصان پہنچا ہے۔
درخواست گزار نے کہا کہ ہتک آمیز مواد کو ہٹانے کے لیے ایف آئی اے اور پی ٹی اے سے رابطہ کیا گیا ہے لیکن یوٹیوب کے خلاف کوئی کارروائی نہیں کی گئی۔
عدالت نے آئندہ سماعت پر ڈپٹی ڈائریکٹر ایف آئی اے سے پیش رفت رپورٹ طلب کرتے ہوئے درخواست کی مزید سماعت 15 آگست تک ملتوی کردی۔
