دبئی: متحدہ عرب امارات کی ریاست دبئی میں مقیم افریقی جوڑے نے کرونا وبا کے دوران عوام کو گھروں پر رہنے کی انوکھے انداز سے ترغیب دے کے انٹرنیٹ صارفین کے دل جیت لیے۔
عرب میڈیا رپورٹ کے مطابق دبئی میں مقیم جنوبی افریقہ سے تعلق رکھنے والے جوڑے نے اپنے فلیٹ کی بالکونی میں میراتھن ریس منعقد کرنے کا اعلان کیا۔
اکتالیس سالہ کولن ایلن اور اُن کی اہلیہ ہیلڈا میرا تھن ریس میں حصہ لے کر بالکونی میں ہی دوڑ لگائیں گے۔
کولن کا کہنا ہے کہ اس اقدام کا مقصد عوام میں کرونا وائرس کی احتیاطی تدابیر سے متعلق شعور اجاگر کرنا ہے تاکہ وبا کے عرصے میں شہری اپنے گھروں پر ہی رہیں۔
انہوں نے کہا کہ میراتھن ریس کا چیلنج 19 میٹر کے فاصلے پر واقع بالکونی میں صبح 6 بجے شروع ہوگا جو 7 سے 8 گھنٹے تک جاری رہے گا۔
ایلن نے وضاحت کی کہ وہ اور ان کی اہلیہ 42.2 کلومیٹر سفر کرنے کا ارادہ رکھتے ہیں۔ بالکونی میں ایک طرف سے دوسری طرف جانا آسان نہیں ہے۔
سوشل میڈیا پر متعدد افراد نے گھر پر میراتھن منعقد کرنے کی ویڈیوز شائع کیں۔
اس سے قبل فرانسیسی شہری نے بھی اپنی سات میٹر لمبی بالکونی پر 6000 سے زیادہ راؤنڈ ٹرپ کیے تھے جس کی ویڈیو انہوں نے انسٹاگرام اکاؤنٹ پر شیئر کی تھی۔
