کراچی : محکمہ موسمیات نے آج کراچی میں ہلکی اوردرمیانہ درجہ کی بارش کی پیش گوئی کردی ہے تاہم موسم مرطوب اور مطلع جزوی ابرآلود رہے گا۔
تفصیلات کے مطابق محکمہ موسمیات نے کراچی میں موسم کی صورتحال کے حوالے سے کہا ہے کہ شام اور رات میں ہلکی اوردرمیانہ درجہ کی بارش کاامکان ہے ،24گھنٹےکے دوران مطلع جزوی ابرآلود اور موسم مرطوب رہے گا۔
محکمہ موسمیات نے کہا کہ شہر کا زیادہ سےزیادہ درجہ حرارت 34 سے36 ڈگری سینٹی گریڈرہنےکاامکان ہے، ہوا میں نمی کا تناسب 81 فیصد ہے جبکہ مغرب سے 9 سے 18 کلو میٹر کی رفتار سے ہوائیں چل رہی ہیں۔
خیال رہے محکمہ موسمیات کا کہنا تھا کہ مون سون کے تیسرے اسپیل میں تیز بارشوں کے امکانات کم ہوگئے ہیں ، جس کے بعد کہیں ہلکی تو کہیں درمیانے درجے کی بارشیں متوقع ہیں، تاہم تیز بارش کے امکانات واضح نہیں ۔
ڈائریکٹر میٹ سردار سرفراز کے مطابق کراچی میں شام سے بادل برسنا شروع ہوسکتے ہیں، مون سون سسٹم کا اثر زیادہ تر مشرقی سندھ کے علاقوں پر رہے گا۔
