راولپنڈی: میٹرو بس سروس کو شہر بھر میں معطل کر دیا گیا۔
پاکستان کے سابق وزیراعظم اور پاکستان تحریک انصاف کے چیئرمین عمران خان کی گرفتاری کے بعد ملک کے مختلف حصوں میں احتجاجی مظاہرے جاری ہیں اس دوران مظاہرین نے راولپنڈی میں میٹرو بس سروس کو بھی نقصان پہنچایا ہے۔
میٹرو بس حکام کا کہنا ہے کہ اسٹیشن پر بوڑھے افراد کیلئے لگائی گئی لفٹ کو بھی توڑ دیا گیا، سکستھ روڈ میٹرو اسٹیشن کو مکمل طور پر تباہ کر دیا گیا۔
عمران خان کو گرفتار کر لیا گیا
میٹرو حکام نے بتایا کہ مظاہرین نے سکستھ روڈ اسٹیشن کے تمام شیشے توڑ دیئے، نقصان کا تخمینہ لگانے کے لیے کمیٹی اپنا کام کر رہی ہے۔
دوسری جانب میٹرو بس سروس معطل ہونے کی وجہ سے شہریوں کو شدید مشکلات کا سامنا کرنا پڑرہا ہے۔
واضح رہے کہ سابق وزیر اعظم عمران خان کی گرفتاری کے بعد لاہور،کراچی، پشاور، کوئٹہ، اسلام آباد اور فیصل آباد سمیت کئی شہروں میں کارکنان کی جانب سے احتجاج جاری ہے۔
