بنگلورو: قومی ٹیم کے ڈائریکٹر مکی آرتھر کا کہنا ہے کہ ہم جانتے ہیں کہ رن ریٹ کیسے بہتر کرنا ہے۔
ورلڈ کپ میں نیوزی لینڈ کے خلاف اہم میچ سے قبل قومی ٹیم کے ڈائریکٹر مکی آرتھر نے پریس کانفرنس کرتے ہوئے کہا کہ ٹورنامنٹ میں بنگلہ دیش کے خلاف پہلی بار بہترین کرکٹ کھیلی ہے۔
انہوں نے کہا کہ نائب کپتان شاداب خان کا ابتدائی میڈیکل ٹیسٹ لیا گیا ہے لیکن ان کی ٹیم میں شمولیت کا فیصلہ نہیں ہوا۔
مکی آرتھر نے کہا کہ جنوبی افریقہ نے ہمیں کسی حد تک فائدہ پہنچایا ہے۔
نیوزی لینڈ کے خلاف میچ کے حوالے سے مکی آرتھر کا کہنا تھا اندازہ ہے کہ یہاں ہائی اسکوررنگ گیم ہوتے ہیں، اعداد و شمار دیکھ کر اپنی حکمت عملی بنا رہے ہیں، ہمارے ذہن میں ہے کہ نیٹ رن ریٹ پر نیوزی لینڈ سے کیسے برتری لینی ہے، ہر طرح کا سیناریو ہمارے پاس موجود ہے، ضروری نہیں کہ میں پلیئرز کو ابھی بتاؤں کہ کیا سیناریو ہے۔
#NZvPAK | #CWC23 | #DattKePakistani pic.twitter.com/m8V441zv4k
— Pakistan Cricket (@TheRealPCB) November 3, 2023
ان کا کہنا تھا ہمارے کھلاڑیوں کیلئے ہر وینیو ایک نیا وینیو ہے، کھلاڑیوں نے ٹی وی پر آئی پی ایل اور ٹیسٹ میچز دیکھے ہیں، ہم ہر گیم جیتنے کیلئے میدان میں اترتے ہیں۔
مکی آرتھر کا کہنا تھا کہ مسلسل سفر کھلاڑیوں کیلئے کوئی مسئلہ نہیں ہے لیکن سخت سکیورٹی کے باعث پریشانی ہے، مشکل ہوتی ہے، ایسا لگتا ہے کہ ہم پھر کووڈ کے وقت میں چلے گئے ہیں، پلیئرز اپنی مرضی سے کہیں آ جا نہیں سکتے، ایسی صورتحال ٹیم پر اثرانداز ہوتی ہے۔
