معروف ٹیکنالوجی کمپنی مائیکروسافٹ نے اعلان کیا ہے کہ اس نے دنیا بھر سے تقریباً 6 ہزار ملازمین کو نوکری سے نکالنے کا فیصلہ کیا ہے جو کمپنی کے کُل ملازمین کا تقریباً 3 فیصد ہے۔
اس حوالے سے کمپنی ترجمان نے ایک بیان میں کہا کہ اس اقدام کا مقصد کمپنی آپریشنز کو زیادہ مؤثر اور منیجمنٹ اسٹرکچر کو بہتر بنانا ہے، کمپنی کے تمام شعبوں سے کی جانے والی ان چھانٹیوں کے فیصلے کا اطلاق دنیا بھر کے ممالک میں ہوگا۔
رپورٹ کے مطابق دلچسپ بات یہ ہے کہ یہ فیصلہ ایک ایسے وقت میں سامنے آیا ہے جب کمپنی نے حال ہی میں اپنی مالی کارکردگی کے بہتر نتائج ظاہر کیے ہیں۔ مائیکروسافٹ نے گزشتہ سہ ماہی میں 25.8 ارب ڈالر کا خالص منافع حاصل کیا جبکہ اپریل کے آخر میں کمپنی نے مثبت مالی پیشگوئی بھی کی تھی۔
جون کے آخر تک مائیکروسافٹ کے دنیا بھر میں 2 لاکھ 28ہزار ملازمین تھے۔ یہ مائیکروسافٹ کی 2023 کے بعد سب سے بڑی چھانٹی ہے، جب 10ہزار ملازمتیں ختم کی گئی تھیں۔
جنوری 2025 میں بھی کچھ ملازمین کو ان کی کارکردگی کی بنیاد پر برطرف کیا گیا تھا، لیکن یہ کارروائی ملازمین کی کارکردگی کی وجہ سے نہیں ہے۔
یاد رہے کہ کمپنی نے گزشتہ چند ماہ کے دوران زائد منافع کے حصول کیلیے ایکس باکس کنسولز کی قیمتوں میں اضافہ کیا تھا جبکہ سب سے کم قیمت سرفیس لیپ ٹاپس کی تیاری ختم کرنے کا اعلان کیا تھا۔
