ریاض: سعودی عرب میں موسم گرما کی شدت میں اضافے کے ساتھ کھلے مقامات پر کام لینے پر پابندی عائد کردی گئی، ہر سال کی طرح رواں سال بھی یہ پابندی 15 جون سے 15 ستمبر تک ہوگی۔
اردو نیوز کے مطابق سعودی وزارت افرادی قوت و سماجی بہبود نے کہا ہے کہ پرائیوٹ سیکٹر کے تمام اداروں و کمپنیوں سے کھلے مقامات پر دوپہر کے وقت ڈیوٹی لینے پر پابندی کے فیصلے پر عمل کروایا جائے گا۔
حکام کا کہنا ہے کہ دوپہر 12 بجے سے سہ پہر 3 بجے تک کھلے مقامات پر ڈیوٹی لینے پر پابندی ہوگی، عمل درآمد جمعرات 15 جون سے 15 ستمبر 2023 تک جاری رہے گا۔
وزارت افرادی قوت کا کہنا ہے کہ پابندی پر عمل درآمد نیشنل کاؤنسل برائے سلامتی و پیشہ ورانہ صحت کے ساتھ تعاون سے کروایا جائے گا۔
وزارت کا کہنا ہے کہ پابندی کا فیصلہ پرائیوٹ سیکٹر کے ملازمین کی صحت و سلامتی کے تحفظ اور انہیں صحت خطرات سے بچانے کی خاطر کیا گیا ہے۔ پیشہ وارانہ صحت و سلامتی کے حوالے سے بین الاقوامی معیار اپنایا جارہا ہے۔
وزارت نے پرائیوٹ کمپنیوں و اداروں کے مالکان سے کہا ہے کہ وہ اپنے یہاں اوقات کار منظم کریں اور پابندی کو مد نظر رکھ کر ڈیوٹی کے نئے شیڈول جاری کریں، دوپہر کے وقت کام پر پابندی نہ کرنے کی رپورٹ موبائل پر وزارت کی ایپ کے ذریعے کی جاسکتی ہے۔
