اسلام آباد: وفاقی وزیر خزانہ مفتاح اسماعیل کا کہنا ہے کہ پاکستان کے دیوالیہ ہونے کا کوئی خدشہ نہیں، ایک دوست ملک نے زرمبادلہ بڑھانے میں ہماری مدد کی درخواست مسترد کردی ہے۔
تفصیلات کے مطابق وزیر خزانہ مفتاح اسماعیل نے متحدہ عرب امارات میں تھنک ٹینک سے گفتگو کرتے ہوئے کہا کہ پاکستان کو عالمی قرضوں کی واپسی کے حوالے سے دیوالیہ ہونے کا خدشہ نہیں۔
مفتاح اسماعیل کا کہنا تھا کہ آئندہ چند ہفتے میں ملک میں ڈالرز کی ترسیل میں اضافہ ہوگا، گورنر اسٹیٹ بینک اور وزیر اعظم جانتے ہیں کہ ہم ڈیفالٹ نہیں کریں گے۔
انہوں نے کہا کہ وزارت خزانہ ادائیگی کے توازن کی صورتحال بہتر بنانے کی کوشش کر رہی ہیں، 2، 3 ماہ کے لیے اعتدال پسندی سے درآمدات کی کوشش کریں گے۔
وزیر خزانہ کا کہنا تھا کہ 2 ہفتوں میں پاکستان میں ڈالرز کی آمد باہر سے زیادہ ہوگی، ایک بار ایسا ہو جائے گا تو روپے پر دباؤ ختم ہو جائے گا۔
انہوں نے کہا کہ ایک دوست ملک سے زرمبادلہ بڑھانے میں ہماری مدد کی درخواست مسترد کردی گئی، ملک کے زرمبادلہ ذخائر کم ہو کر محض 9.32 ارب ڈالرز رہ گئے ہیں۔
وزیر خزانہ کا مزید کہنا تھا کہ زرمبادلہ ذخائر 45 دن کی درآمدات پورا کرنے کے لیے کافی ہیں۔
