اسلام آباد: 7 رکنی لارجر بینچ کی عدم دستیابی پر ملٹری کورٹ ٹرائل کیس ڈی لسٹ ہوگیا، رجسٹرار آفس نے نوٹس جاری کردیا۔
تفصیلات کے مطابق سپریم کورٹ میں لارجر بینچ دستیاب نہ ہونے پر ملٹری کورٹ ٹرائل کیس ڈی لسٹ کردیا گیا ہے، رجسٹرار آفس نے 20 اور21 جنوری کی سماعت ڈی لسٹ کرنے کے حوالے سے نوٹس جاری کردیا ہے۔
انتخابی دھاندلی کی تحقیقات کیلئے بانی پی ٹی آئی کی درخواست سماعت کیلئے مقرر کردی گئی ہے، جسٹس امین الدین کی سربراہی میں 6 رکنی آئینی بینچ کل سماعت کرےگا۔
آئینی بینچ میں دھاندلی کیخلاف شیر افضل مروت کی درخواست پر بھی سماعت ہوگی، سپریم کورٹ میں صحافی ارشد شریف قتل کیس بھی سماعت کیلئے مقرر کیا گیا ہے۔
جسٹس امین الدین کی سربراہی میں 6 رکنی آئینی بینچ کل سماعت کریگا، ارکان اسمبلی کے ترقیاتی فنڈز پر ازخود نوٹس سماعت کیلئے مقرر کیا گیا ہے۔
اس کے علاوہ طلبا یونینز پر پابندی کیخلاف درخواست بھی سماعت کیلئے مقرر کردیا گیا ہے، جسٹس امین الدین کی سربراہی میں ہی 6 رکنی آئینی بینچ کل اس پر سماعت کرےگا۔
