کراچی : کمشنر کراچی کی جانب سے دودھ کی نئی سرکاری قیمت کا نوٹیفکیشن ڈیری اینڈ کیٹل فارمرز ایسوسی ایشن نے مسترد کردیا۔
اس حوالے سے صدر ڈیری اینڈ کیٹل فارمرز ایسوسی ایشن شاکر عمرگجر نے میڈیا کو بتایا کہ دودھ کی قیمتوں کانوٹیفکیشن حقائق کے مطابق نہیں۔
انہوں نے کہا کہ دودھ کی پیداواری لاگت200روپیہ فی لیٹر بنتی ہے جبکہ ڈیری فارمرز کو اس کے برعکس 163روپیہ دیا گیا ہے۔
صدرڈیری اینڈکیٹل فارمرز نے کہا کہ دودھ کی قیمت میں اس کی لاگت،مڈل مین کا منافع، ریٹیلرزکا نفع اور اخراجات کو شامل کیا جائے۔
شاکرعمر گجر کے مطابق ان تمام اخراجات کو شامل کرکے دودھ کی موجودہ قیمت 230روپیہ فی لیٹر قیمت بنتی ہے، کمشنر کراچی سے اپیل ہے کہ نوٹیفکیشن پرنظرثانی کی جائے۔
مزید پڑھیں : کراچی میں دودھ کی قیمت میں 10 روپے فی لیٹر اضافہ
واضح رہے کہ کمشنر کراچی اور ڈیری فارمرز کے درمیان اتفاق رائے پر مبنی نوٹیفکیشن جاری کردیا گیا ہے۔ نوٹیفکیشن کے مطابق ڈیری فارمرز کا نرخ 163 روپے ہول سیلر کا 170 روپے مقرر کیا گیا ہے جبکہ ریٹیل سطح پر دودھ 180 روپے فی لیٹر دستیاب ہوگا۔
