10 ملین سے زائد آسٹریلین شہری اس وقت موبائل فون اور انٹرنیٹ کی سروس سے محروم ہو گئے جب ملک کی دوسری بڑی نیٹ ورک آپریٹر کمپنی کی سروسز کو بندش کا سامنا کرنا پڑا۔
بین الاقوامی خبر رساں ادارے کی رپورٹ کے مطابق آسٹریلیا کی دوسری بڑی نیٹ ورک آپریٹر سروس کمپنی OPTUS کی سروسز کو مقامی وقت کے مطابق صبح 4 بجے بندش کا سامنا کرنا پڑا، جس کے باعث ٹرین سروس کا آن لائن پیمنٹ آپریشن سسٹم بھی شدید متاثر ہوا۔
آسٹریلوی حکومت کا اس حوالے سے کہنا تھا کہ نیٹ ورک آپریٹر سروس کمپنی کی خرابی کے باعث موبائل فون اور انٹرنیٹ سروس متاثر ہوئی ہے۔
نیٹ ورک آپریٹر سروس کمپنی کی سی ای او نے ایک انٹرویو کے دوران سائبر حملے کی سختی سے تردید کی تاہم انہوں نے سروسز کی معطلی کی وجوہات سے آگاہ نہیں کیا۔
سی ای او کا مزید کہنا تھا کہ یہ بہت ہی غیر معمولی واقعہ ہے، ہماری ٹیم اس پر کام کر رہی ہے، بہت جلد اسے حل کر لیا جائے گا۔ انہوں نے انٹرنیٹ اور موبائل فون سروس کی معطلی کو غیرمعمولی قرار دیتے ہوئے کہا OPTUS کے سافٹ ویئر سسٹم میں مسئلہ ہوا، ہمارا سسٹم بہت مضبوط ہے۔
