یہ ایک عجیب و غریب تصویر ہے، جسے کچھ دیر بغور دیکھنے سے آپ چند سیکنڈ کے لیے کلر بلائنڈ ہو جائیں گے۔
نہیں، پریشانی کی کوئی بات نہیں ہے، یہ آنکھوں کو کلر بلائنڈ بنانے کا بس نظر کا ایک دھوکا ہے، جو چند لمحوں تک ہی رہتا ہے۔
اس بصری دھوکے نے دنیا بھر کے لاکھوں ناظرین کو حیرانی میں اپنی آنکھیں مسلنے پر مجبور کیا ہے، انھیں چند لمحوں تک یقین نہیں آیا کہ کیا وہ واقعی ایک بلیک اینڈ وائٹ تصویر میں رنگ دیکھ رہے ہیں۔
دراصل ٹک ٹاک کے ایک صارف پروفیسر اے ایم ایکس نے ایک ویڈیو شیئر کی ہے، جس میں انھوں نے ناظرین کی آنکھوں کی صلاحیت کو چیلنج کیا ہے، ٹک ٹاک پر پروفیسر کے 12 لاکھ سے زیادہ فالوورز ہیں۔
ویڈیو میں پروفیسر نے سب سے پہلے ایک بلیک اینڈ وائٹ تصویر دکھائی، ان کا کہنا تھا کہ یہ انھوں نے ایتھوپیا کے سفر کے دوران لی تھی۔
اس تصویر کو انھوں نے چند جعلی رنگوں میں دکھایا، اور ہدایت کی میں نے اس تصویر کے درمیان ایک سفید نقطہ لگا دیا ہے، اور آپ نے 20 سیکنڈوں تک اسے گھورنا ہے۔
اس کا مقصد پروفیسر نے یہ بتایا کہ اس سے آپ کی آنکھوں میں روشنی کے رسیپٹرز کی حساسیت تصویر کے مختلف رنگوں کے ساتھ مانوس ہو جائے گی۔
اس کے بعد انھوں نے تصویر اصل حالت میں دکھائی، یعنی سیاہ اور سفید رنگوں میں، لیکن یہ کیا ….. چند لمحوں تک آپ کی آنکھوں نے وہی جعلی رنگ دیکھے۔
پروفیسر نے کہا دراصل آنکھوں میں روشنی کے رسیپٹرز کی حساسیت جب رنگوں کے ساتھ مانوس ہو جاتی ہے، تو دماغ کچھ دیر تک وہی سمجھتا ہے، یہی وجہ ہے کہ تصویر بدلنے کے بعد بھی رنگ دکھائی دیتے ہیں۔
یہ کلپ اتنی وائرل ہوئی ہے کہ اسے ٹک ٹاک پر 20 لاکھ سے زیادہ لوگوں نے لائک کیا ہے۔
