اسلام آباد : منرل واٹر استعمال کرنے والوں کے لیے اہم خبر آگئی ، ملک میں تیار 27 برانڈز غیر محفوظ قرار دے دیئے گئے۔
تفصیلات کے مطابق قومی اسمبلی اجلاس میں وقفہ سوالات کے دوران وزارت سائنس و ٹیکنالوجی نے غیر محفوظ منرل واٹر برانڈز کی تفصیلات ایوان میں پیش کر دیں۔
جس میں ملک میں تیار ہونے والے منرل واٹرز کے 27 برانڈز غیر محفوظ قرار دے دیا ، پاکستان تحقیقی کونسل برائے آبی وسائل نے 27 منرل واٹر برانڈز کو غیر محفوظ قرار دیا ہے۔
پی سی آر ڈبلیو آر نے گزشتہ ماہ منرل واٹر کے معیار کی سہ ماہی رپورٹ جاری کی ہے، وزارت سائنس و ٹیکنالوجی نے کہا کہ منرل واٹر کے معیار بارے سہ ماہی رپورٹ اکتوبر تا دسمبر 2024 کی ہے، پی سی ایس آئی آر کو منرل واٹر برانڈز کے 194 سیمپلز موصول ہوئے تھے،غیر محفوظ منرل واٹر بیچنے والی کمپنیز کی تعداد 27 نکلی۔
رپورٹ میں کہا گیا کہ غیر رجسٹرڈ منرل واٹر بیچنے والی دو کمپنیوں کے لائسنس منسوخ کر دیئے گئے ہیں اور غیر قانونی منرل واٹر تیار کرنے والی 6 کمپنیوں کو نوٹس کا اجرا ہوا ہے۔
رپورٹ کے مطابق بوتلوں میں بند پینے کے پانی کی 27 کمپنیز کو کیمیائی و مائیکرو بائیولوجیکل معیارات کی بنیاد پر غیر محفوظ قرار دیا گیا ہے۔
پریزائیڈنگ آفیسر نے بتایا کہ کمپنیاں منرل واٹر کے نام پر صاف پانی کے بجائے نجانے کیا کچھ پلا رہی ہیں، جس پر قادر پٹیل نے کہا غیر معیاری پانی بیچنے والی کو جرمانہ نہ ہونے کے برابر ہے، امید ہے حکومت منرل واٹر کمپنیز کے حوالے سے مناسب ریگولیشنز تیار کرے گی۔
