میرپور آزاد کشمیر : ایٹمی سائنسدان ڈاکٹر ثمر مند مبارک نے کہا ہے کہ امریکہ اور روس کے بعد پاکستان کامیزائل سسٹم جدت کے لحاظ سے تیسرے نمبرپرہے، دنیا نہیں جانتی کہ ہم اقبال کے شاہین ہیں۔
ان خیالات کا اظہار انہوں نے میرپور آزاد کشمیر میں کامسٹ یونیورسٹی میں منعقدہ تقریب سے خطاب کرتے ہوئے کیا، انہوں نے کہا کہ پاکستان کا جدید نیوکلیئر میزائل نصر ہے جو امریکہ کے پاس بھی نہیں ہے۔ میڈیا پر دکھایا جانے والا چہرہ اصل نہیں پاکستانی قوم کا اصل چہرہ باصلاحیت نوجوان ہیں۔
ڈاکٹرثمر مند مبارک نے کہا کہ قیام پاکستان کے وقت فوج تھی نہ وسائل مگر اس وقت بھی پاکستان دنیا کی چھٹی ایٹمی اور پہلی اسلامی ایٹمی طاقت تھا۔ دشمن پاکستان کےخلاف کسی مہم جوئی سے پہلے ہزار مرتبہ سوچتا ہے۔
مغرب حیران ہے کہ غربت ناخواندگی اور مسائل میں جکڑی قوم میزائل ٹیکنالوجی میں تیسرے نمبر پر ہے، عراق دنیا میں تیل کی تیسری بڑی منڈی ہونے کے باوجود اپنا دفاع نہ کرسکا۔
ان کا کہنا تھا کہ کشمیر پاکستان کی شہ رگ ہے لائن آف کنٹرول پر ایک بھی کشمیری شہید ہوتا ہے تو ہمارے دل غمزدہ ہوجاتے ہیں۔
