کراچی: شہر قائد میں ڈیفنس بدر کمرشل میں موبائل فون کی دکان پر ڈکیتی کی بڑی واردات ہوئی ہے، کار میں آنے والے 4 لٹیرے لاکھوں کے موبائل فون اور کیش لوٹ کر فرار ہو گئے، واردات کی سی سی ٹی وی فوٹیج اے آر وائی نیوز نے حاصل کر لی۔
تفصیلات کے مطابق ڈی ایچ اے فیز 5 بدر کمرشل پر موبائل فون کی دکان پر ڈکیتی کی واردات ہوئی ہے، جہاں چار ملزمان کار میں آئے اور لوٹ مار کر کے فرار ہو گئے، یہ واردات رات 11 بجے کے قریب کی گئی، لٹیرے سفید رنگ کی کرولا کار میں آئے تھے۔
واردات کے دوران ایک ڈاکو باہر کار میں بیٹھا رہا، جب کہ شلوار قمیض میں ملبوس 3 ڈاکو دکان کے اندر داخل ہوئے، سب سے پہلے سفید شلوار قمیض والا لٹیرا موبائل فون پر بات کرتے ہوئے ایک کسٹمر کی طرح اندر داخل ہوا، پھر ہرے رنگ کے کپڑے پہنے ڈاکو نے اندر اخل ہوتے ہی پستول نکالی، اس کے بعد نیلے رنگ کے شلوار قمیض میں ملبوس ڈاکو نے بھی پستول نکال لی۔
مہنگی ترین منشیات ویڈ کی اسمگلنگ کا نیا طریقہ سامنے آگیا
ایک لٹیرا کاؤنٹر کے اندر داخل ہوا اور موبائل پسند کرنے لگا، ڈاکوؤں نے اپنی پسند کا ایک آئی فون 16 پرومیکس ایک 14 پرومیکس، 3 ڈبا پیک نوکیا کے موبائل نکالے، اور کیش کاؤنٹر سے 30 ہزار روپے کے قریب کیش بھی لوٹا۔
فوٹیج میں واردات کرنے والے تینوں لٹیروں کے چہرے واضح طور پر دیکھے جا سکتے ہیں، دکان دار کے مطابق لاکھوں کی واردات ہوئی ہے، اور پولیس کو ڈاکوؤں کی سی سی ٹی وی فوٹیجز بھی فراہم کر دی گئی ہیں۔
