موبائل فون کا استعمال ہماری زندگی کی بڑی اور اہم ضروریات میں شمار ہوتا ہے، یہ ہمارے رابطوں کا آسان ذریعہ ہے تو اس کے نقصانات بھی ہیں جنہیں سامنے رکھتے ہوئے اس کا استعمال کرنا چاہیے۔
گزشتہ چند سالوں کے دوران کچھ ایسے واقعات میڈیا میں سامنے آئے کہ جس میں موبائل فون پھٹنے سے کئی صارفین شدید زخمی ہوئے، ایسا ہی ایک واقعہ سعودی عرب میں بھی پیش آیا ہے۔
میڈیا رپورٹ کے مطابق رفحہ گورنری میں ایک خاندان اس وقت بال بال بڑی تباہی سے بچ گیا جب لڑکی کے ہاتھ میں موبائل فون زوردار دھماکے سے پھٹ گیا، جس کے نتیجے میں تیرہ سالہ لڑکی بُری طرح جھلس گئی۔
گھر کے سربراہ نے واقعے سے متعلق بتایا کہ موبائل چارجر سے جڑا تھا اور لڑکی فون پکڑے سو گئی تھی، لڑکی کی چیخ و پکار سن کر اہل خانہ جاگے تو اس کے ہاتھ میں موبائل فون جلتا دیکھ کر ہم گھبرا گئے۔
A 13-year-old girl sustained burns when a mobile phone caught fire while charging in the Northern Border Region of #SaudiArabia. https://t.co/bKJ0SbIwtM
— Saudi Gazette (@Saudi_Gazette) February 3, 2023
میڈیا رپورٹ کے مطابق لڑکی کو فوری طور پر طبی امداد کے لئے رفحہ سینٹرل اسپتال منتقل کیا گیا جہاں وہ اب روبہ صحت ہے۔
یہ بھی پڑھیں: دوران گفتگو موبائل فون کان کے پاس پھٹ گیا، پھر کیا ہوا؟
لڑکی کے والد نے انکشاف کیا کہ ان کی بیٹی اکثر اپنے موبائل فون کو چارجر سے منسلک کرکے سوجاتی تھی۔
واضح رہے کہ اس سے قبل بھی متعدد بار غیر معیاری چارجر کے استعمال یا چارجنگ کے دوران استعمال کی وجہ سے موبائل فون پھٹنے کے واقعات پیش آچکے ہیں۔