کراچی: شہر قائد میں ڈاکو راج، دن دیہاڑے موبائل فون کمپنی کی فرنچائز لوٹ لی گئی۔
تفصیلات کے مطابق صدر میں واقع موبائل فون کمپنی کی فرنچائز میں ڈکیتی کی واردات ہوئی ہے، جہاں دو مسلح ملزمان اسلحے کی نوک پر کمپنی میں داخل ہوئے اور اسٹاف کو یرغمال بنالیا۔
مسلح ملزمان فرنچائز سے دو لاکھ روپے کیش، دو قیمتی موبائل سمیت دو لیپ ٹاپ لیکر باآسانی فرار ہوگئے۔
واقعے کے بعد پولیس جائے وقوعہ پر پہنچی اور شواہد جمع کئے، ابتدائی تحقیق کے دوران انکشاف ہوا کہ فرنچائز کا سی سی ٹی وی کیمرا خراب تھا۔
پولیس کے مطابق ملزمان نے کارروائی انتہائی باریک بینی سے کی اور دفتر کی بالائی منزل پر نہیں گئے جہاں کیمرے نصب تھے، اطراف کے سی سی ٹی وی کی مدد سے ملزمان کی شناخت کی جارہی ہے،کوشش کررہے ہیں کہ ملزمان تک پہنچ جائیں۔
یہ بھی پڑھیں: کراچی سے چھینے گئے فون افغانستان اسمگل کرنے کا انکشاف
دوسری جانب کراچی کے پوش علاقے پی ای سی ایچ سوسائٹی میں ڈاکوؤں نے غریب شہری سے 10 ہزار روپے چھین لئے، نادر نامی شہری نے اے ٹی ایم مشین کا دروازہ لاک کرکے رقم نکلوا نکلوائی تھی۔
واقعے کی سی سی ٹی وی فوٹیج اے آر وائی نیوز نے حاصل کرلی ہے، ویڈیو میں دیکھا جاسکتا ہے کہ رقم نکلوانے کے دوران مسلح ملزم کو بینک کے باہر شہری کا انتظار کرتا دکھائی دے رہا ہے۔ شہری جیسے ہی اے ٹی ایم سے باہر آیا، ملزم نے اسلحہ دکھا کر شہری سے رقم لی اور فرار ہوگیا۔
