لندن : یورپی یونین کونسل اور یورپی پارلیمنٹ نے شینگن ویزوں کی ڈیجیٹلائزیشن سے متعلق نئے مسودہ قانون پر اتفاق کرلیا ہے۔
اس قانون کے تحت شینگن ویزا ڈیجیٹل پلیٹ فارم کے ذریعے حاصل کرنے کیلئے عمل درآمد کا طریقہ کار جدید ہوگا۔
مذکورہ قانون کے نفاذ کے بعد پاسپورٹ پر چسپاں ویزے ڈیجیٹل ہو جائیں گے اور ان کا اجراء انٹرنیٹ پر ٹوڈی بارکوڈ کے طور پر کیا جائیگا۔
اس قانون کے تحت ویزے موبائل فون پر ڈاؤن لوڈ کیے جا سکیں گے اور ویزا کے درخواست دہندگان کئی زبانوں میں آن لائن ویزا کے لیے درخواست بھی دے سکیں گے۔
نئے نظام کے ساتھ درخواستوں پر ایک ہی انٹرنیٹ پلیٹ فارم کے ذریعے کارروائی کی جائے گی۔ ضروری دستاویزات اس پلیٹ فارم کے ذریعے اپ لوڈ کیے جائیں گے اور ویزا فیس یہاں جمع کی جا سکتی ہے۔
صرف وہ لوگ جو پہلی بار ویزا کی درخواست کرتے ہیں، جن کا بائیو میٹرک ڈیٹا درست نہیں ہے اور جن کے پاس نئے پاسپورٹ ہیں انہیں شینگن ممالک کے قونصل خانوں میں ذاتی طور پر اپلائی کرنا ہوگا۔
شینگن ویزوں کی ڈیجیٹلائزیشن کے ساتھ اس کا مقصد لاگت کو کم کرنا اور ویزا کی درخواستوں کو تیز کرنا اور سہولت فراہم کرنا ہے، اس کے ساتھ ساتھ یورپی یونین کا مقصد اس طرح شینگن علاقے کی سکیورٹی کو بڑھانا ہے۔
مسودہ قانون یورپی یونین کے سرکاری جریدے میں شائع ہونے کے 20 دن بعد یورپی کونسل اور یورپی پارلیمنٹ کی طرف سے اس کی باضابطہ منظوری کے بعد نافذ العمل ہوگا۔
