مالے: مالدیپ میں صدارتی انتخابات کا اختتام ہوگیا، الیکشن میں چین کے حامی امیدوار محمد معیزو نے کامیابی حاصل کرلی۔
بین الاقوامی خبر رساں ادارے کی رپورٹ کے مطابق نو منتخب صدر محمد معیزو نے 54.06 فیصد ووٹ حاصل کرلئے تھے جب صدر ابراہیم محمد صالح نے آدھی رات سے کچھ دیر قبل اپنی ہار کو تسلیم کرلیا۔
سماجی رابطے کی ویب سائٹ X پر صدر ابراہیم محمد صالح نے تحریر کیا کہ نومنتخب صدر معیزو کو مبارک ہو۔ میں ان لوگوں کو بھی مبارکباد دیتا ہوں جنہوں نے الیکشن میں پرامن اور جمہوری عمل کا مظاہرہ کیا ہے۔
محمد معیزو نے اپنی پارٹی کے مہم کے ہیڈکوارٹر کے باہر ایک مختصر خطاب کیا، انہوں نے اپنے حمایتوں سے کہا کہ وہ اتوار کی صبح تک جشن نہ منائیں جب تک کہ انتخابی پابندیاں باضابطہ طور پر ختم نہیں ہوجاتیں۔
واضح رہے کہ 61 سالہ موجودہ صدر ابراہیم محمد 17 نومبر تک معیزو کے دفتر سنبھالنے تک نگراں صدر کے امور انجام دیتے رہیں گے۔
دوسری جانب پاکستان کے نگراں وزیراعظم انوار الحق کاکڑ نے بھی معیزو کو الیکشن میں کامیابی حاصل کرنے پر مبارکباد پیش کی۔
پاکستان کے نگراں وزیراعظم انوار الحق کاکڑ کا کہنا تھا کہ مالدیپ کے صدارتی انتخابات میں فتح پر ڈاکٹر محمد معیزو کو دلی مبارکباد پیش کرتے ہیں۔
انہوں نے کہا کہ پاکستان اور مالدیپ کے درمیان تعلقات اور علاقائی تعاون کو مزید مضبوط بنانے کے لیے ان کے ساتھ کام کرنے کے منتظر ہیں۔
