قومی ٹیم کے کپتان محمد رضوان کا کہنا ہے کہ پچ بیٹنگ کے لیے آسان نہیں تھی۔
کراچی کے نیشنل بینک اسٹیڈیم میں کھیلے گئے چیمپئنز ٹرافی کے پہلے میچ میں نیوزی لینڈ نے دفاعی چیمپئن پاکستان کو 60 رنز سے شکست دے دی۔
میچ کے بعد میڈیا سے گفتگو کرتے ہوئے محمد رضوان نے کہا کہ فخر زمان کی انجری سے متعلق کچھ بھی کہنا قبل از وقت ہے، فخر زمان پاور پلے بیٹنگ نہیں کرسکے جس کا نقصان ہوا۔
انہوں نے کہا کہ نیوزی لینڈ کی ٹیم نے بہت اچھا اسکور بنایا، ہم سوچ رہے تھے 260 رنز بنیں گے، ٹام لیتھم اور ول ینگ نے شاندار بیٹنگ کی۔
محمد رضوان نے کہا کہ پاکستان دفاعی چیمپئن ہے جس کا ہم پر اضافی دباؤ ہے۔
دوسری جانب کیوی کپتان مچل سینٹنر نے کہا کہ پاکستان کے بولرز نے اچھی بولنگ کی، ہم نے سوچا تھا 280 رنز تک بنائیں گے، مڈل میں ہماری اچھی شراکت بنی جس سے آخر میں زیادہ رنز بنے۔
انہوں نے کہا کہ ہمارے بولرز نے لگاتار ڈاٹ بالز کیں جس کا دباؤ پاکستان پر بنا ہے۔
واضح رہے کہ پاکستان کرکٹ ٹیم میچ کے بعد کراچی سے دبئی روانہ ہوگی، ٹیم صبح نجی فلائٹ سے دبئی جائے گی، قومی ٹیم 23 فروری کو بھارت کے مدمقابل ہوگی۔
قومی اسکواڈ جمعرات کو آرام کرے گا، قومی ٹیم جمعہ کو ٹریننگ سیشن میں حصہ لے گی۔
