کراچی: حیدرآباد سے تعلق رکھنے والے پاکستانی نژاد کینیڈین شہری محمد شعیب کو کینیڈا کے شہر بریمپٹن کا بزنس ایمبیسڈر مقرر کر دیا گیا۔
تفصیلات کے مطابق حیدرآباد سندھ کے محمد شعیب، جو گزشتہ بیس سال سے کینیڈا میں مقیم ہیں، کو کینیڈا کے شہر بریمپٹن کا بزنس ایمبیسڈر مقرر کیا گیا ہے۔
پاکستانی کمیونٹی میں ایک فعال اور معتبر مقام رکھنے والے شعیب نے بزنس کے شعبے میں اپنی کامیابیوں کے علاوہ سماجی، تعلیمی، اور تفریحی شعبوں میں بھی نمایاں کردار ادا کیا ہے۔
محمد شعیب کا کرکٹ کے کھیل سے گہرا لگاؤ ہے اور وہ کینیڈا میں ٹیپ بال کرکٹ ٹورنامنٹ کے انعقاد میں پیش پیش رہے ہیں، ان کی متحرک شخصیت نے نہ صرف خود کو بلکہ دیگر افراد کو بھی سماجی اور کاروباری سرگرمیوں میں فعال رکھا۔
شعیب کی کمیونٹی سروسز اور بزنس کے شعبے میں ان کی بے مثال خدمات کے اعتراف میں سٹی آف بریمپٹن نے انھیں کمیونٹی سروسز انسپریشنل سٹیزن ایوارڈ سے نوازا ہے، یہ اعزاز نہ صرف محمد شعیب کے لیے بلکہ حیدرآباد سندھ کے لیے بھی قابل فخر ہے۔
شعیب نے اپنی اس کامیابی پر بریمپٹن کے میئر، عوام اور پاکستانی کمیونٹی کا شکریہ ادا کیا ہے اور کہا کہ وہ بریمپٹن کے کاروباری مواقع کو وسعت دینے اور مقامی کمیونٹی کی فلاح و بہبود کے لیے مزید متحرک رہیں گے۔
