کراچی: قومی ٹیم کے بیٹنگ کوچ محمد یوسف کا کہنا ہے کہ میں وکٹ بنانے کا ماہر نہیں ہوں جب ملتان میں پچز دیکھنے گیا تو بتایا گیا کہ ہمارے پاس وہ مٹی نہیں جو درکار ہے۔
پاک نیوزی لینڈ دوسرے ٹیسٹ میچ کے دوسرے روز کھیل کے اختتام پر بیٹنگ کوچ محمد یوسف نے میڈیا سے گفتگو کرتے ہوئے کہا کہ موجودہ صورتحال میں وکٹ ٹرن کررہی ہے وسیم اکرم اور وقار یونس کے دور میں باؤنسی وکٹ ہوتی تھی۔
Pakistan batting coach Mohammad Yousuf press conference | 2nd Test Day 2#PAKvNZ | #TayyariKiwiHai https://t.co/h6ltFDN3uQ
— Pakistan Cricket (@TheRealPCB) January 3, 2023
انہوں نے کہا کہ نیوزی لینڈ کے خلاف پہلا ٹیسٹ اچھا رہا تھا ٹیسٹ کرکٹ کے لیے تجربہ اہمیت رکھتا ہے یہ بھی ایک کمرہ امتحان ہے جس میں بیٹر کے گیم کو چھیڑا نہیں جاسکتا۔
محمد یوسف نے کہا کہ عبداللہ شفیق نے انگلینڈ کے خلاف سنچری اسکور کی تھی اگر کچھ اننگز خراب ہوجائیں تو کھلاڑی کو فکر لاحق ہوجاتی ہے تکنیکی طور پر عبداللہ شفیق کو تبدیل نہیں کیا جاسکتا.
بیٹنگ کوچ نے مزید کہا کہ کپتان یا مینجمنٹ کی جانب سے بیٹرز کو کوئی ہدایات نہیں ملتیں سب کھلاڑی اپنا نیچرل گیم کھیل رہے ہیں۔
واضح رہے کہ کراچی ٹیسٹ کے دوسرے روز کیوی ٹیم 449 رنز پر آل آؤٹ ہوگئی، پاکستان نے تین وکٹوں کے نقصان پر 154 رنز بنالیے ہیں جبکہ مہمان ٹیم کی برتری ختم کرنے کے لیے مزید 295 رنز درکار ہیں۔ امام الحق 74 اور سعود شکیل 13 رنز کے ساتھ کریز پر موجود ہیں۔
