حیدرآباد : معروف بھارتی اداکار شاہ رخ خان کا کہنا ہے کہ میں اردو زبان کی ترویج کے لیے جو کام کرسکتا ہوں ضرور کروں گا کیوں کہ میرے والد بھی اردو سے بہت محبت کرتے تھے اور نفیس اردو بولا کرتے تھے،والد کی وجہ سے ہی میں تھوڑی بہت اردو بول پاتا ہوں۔
یہ بات معروف اداکار شاہ رخ خان نے بھارتی حیدر آباد میں واقع مولانا آزاد قومی یونیورسٹی کی چھٹی سالانہ تقریب برائے تقسیم اسناد سے خطاب کرتے ہوئے کہی۔
اس موقع پر یونیورسٹی کے چانسلر نے اداکار شاہ رخ کو ڈاکٹریٹ کی اعزازی ڈگری پیش کی۔
شاہ رخ نے تقریب تقسیم اسناد سے خطاب کرتے ہوئے یونیورسٹی کی انتظامیہ اور فیکلٹی کا شکریہ ادا کرتے ہوئے کہا کہ میں یہ ڈگری ملنے پر بہت خوش ہوں اور اگر میرے والدین حیات ہوتے تو اور بھی خوش ہوتے کیوں کہ میری ماں کا تعلق بھی حیدر آباد سے ہے جہاں مجھے اس اعزاز سے نوازا گیا۔
جب کہ میرے والد اردو زبان کے بڑے قدردان تھے وہ بہت عمدہ اور نفیس اردو بولا کرتے تھے اور وہ مولانا آزاد کے مداح بھی تھے اور مولانا آزاد کے نام پر ہی یہ یونیورسٹی ہے،اس لیے میرے لیے یہ اعزاز تہری خوشی کا باعث بنا ہے۔
انہوں نے کہا کہ اردو زبان سمیت دیگر زبانوں کے حوالے سے جو بھی خدمت میں کرسکتا ہوں اسے جاری رکھوں گا. شاہ رخ خان نے اپنا خطاب اردو زبان میں شروع کیا جب کہ اختتامی الفاظ انگریزی میں ادا کیے۔
