لاہور : مسلم لیگ ق کے رہنما مونس الٰہی کا کہنا ہے کہ مدتوں بعد قوم کو عمران خان جیسا رہنما نصیب ہوا،ہر موقع پر ان کا ساتھ دیں گے۔
تفصیلات کے مطابق مسلم لیگ ق کے رہنما مونس الٰہی سے پی ٹی آئی رہنماعمران اسماعیل اورعامر کیانی کی ملاقات ہوئی۔
ملاقات میں مونس الہی نے کہا کہ عمران خان قوم کے حقیقی لیڈر ہیں، مدتوں بعد قوم کو ایسا رہنما نصیب ہوا، ہر موقع پرعمران خان کا ساتھ دیں گے۔
رہنما ق لیگ کا کہنا تھا کہ وضع دارلوگ ہیں جس کےساتھ چلتے ہیں تو ساتھ نبھاتے بھی ہیں، پنجاب حکومت عمران خان کی امانت ہے ، جب چاہیں واپس لے لیں۔
انھوں نے کہا کہ عوام کی خدمت کے لئے آئے،جب تک اللہ کو منظور ہوگا کام کریں گے، اپوزیشن کا جم غفیر عمران خان کو دیکھ کر کانپ رہا ہے۔
اپوزیشن پر تنقید کرتے ہوئے مونس الہی کا کہنا تھا کہ اپوزیشن والےخوفزدہ ہیں کہ عمران خان اب کیاکرنےوالے ہیں، اسمبلیوں سے استعفے دیے توبھی اپوزیشن کا حکومت بنانے کاخواب ادھوراہی رہے گا۔
اس موقع پر پی ٹی آئی رہنما عمران اسماعیل نے کہا کہ پرویز الٰہی او رمونس الٰہی ہمارےقابل قدراتحادی ہیں،پورا اعتماد ہے، پرویزالٰہی اورمونس الٰہی نےساتھ دےکر دل جیت لئے۔
