کراچی: ملک میں منکی پاکس کے پھلاؤ اور روک تھام کے لیے ائرپورٹ سیکیورٹی فورس (اے ایس ایف) نے نئی ایس او پیز جاری کردی ہیں۔
اے آر وائی کے مطابق ایئرپورٹ سیکیورٹی فورس نے منکی پاکس سے بچاؤ کیلئے کراچی سمیت ملک کے دیگر آپریشنل ایئر پورٹس پر ہیلتھ ایمرجنسی نافذ کردیں گئی ہے۔
ایس او پیز کے مطابق تمام اے ایس ایف کا عملہ اب سے فوری طور پر فیس ماسک پہنے گا اس کے علاوہ مسافروں کی تلاشی اور سامان چیکنگ کے دوران دستانے پہننا بھی لازمی ہے۔
دوسری جانب ایئرپورٹ میں داخلے کیلئے عارضی پاسز کا اجرا بھی روک دیا گیا ہے۔
واضح رہے کہ پاکستان میں اب تک منکی پاکس کے 2 کنفرم کیسز راولپنڈی / اسلام آباد میں سامنے آچکے ہیں اور حکومت نے اس حوالے سے الرٹ جاری کردیا ہے۔
ادارہ قومی صحت نے وفاقی اور صوبائی حکام کو منکی پاکس کے مشتبہ کیسز سے متعلق ہائی الرٹ جاری کیا ہے اور ملک کے تمام داخلی راستوں اور ائیر پورٹس پر مسافروں کی سخت نگرانی کرنے کی ہدایت جاری کی گئی ہے۔
