نیشنل ڈیزاسٹر مینجمنٹ ( این ڈی ایم اے ) نے ملک بھر میں مون سون بارشوں کے نئے اسپیشل کی پیشگوئی کردی۔
تفصیلات کے مطابق ملک میں مون سون کا ایک اور سسٹم برسنے کو تیارہے، این ڈی ایم اے نے مون سون کے نئے اسپیل کی پیش گوئی کردی۔
این ڈی ایم اے کا کہنا ہے کہ بارش کا نیا سلسلہ 2 سے 5 ستمبر تک جاری رہے گا، راولپنڈی، اسلام آباد سمیت پوٹھوہار ریجن، لاہور، فیصل آباد، گوجرانوالہ میں ہلکی بارش متوقع ہے۔
این ڈی ایم اے کے مطابق خیبرپختونخوا میں ملاکنڈ، ہزارہ اور پشاور ڈویژن میں ہلکی سے تیز بارش ہوسکتی ہے، قلات ڈویژن، کوئٹہ، پشین، کیرتھر اور کوہ سلیمان میں بھی ہلکی سے تیز بارش جبکہ شمالی سندھ میں ہلکی سے درمیانی بارش کا امکان ہے۔
این ڈی ایم اے کے مطابق بارشیں اربن فلڈنگ اور ندی نالوں میں طغیانی کا باعث بن سکتی ہیں، تمام متعلقہ محکموں کو الرٹ رہنے اور حفاظتی اقدامات یقینی بنانے کی ہدایت کردی گئی ہے۔
