بھارتی موسیقار سدھو موسی والا کے المناک قتل اورزندگی سے متعلق آن اسکرین پروجیکٹ پر کام جاری ہے۔
بھارتی میڈیا رپورٹ کے مطابق بھارتی فلمساز سری رام راگھون پروڈکشن ہاؤس کی جانب سے کتاب ’ہو کِلڈ سدھو موسے والا‘ پر فلم یا سیریز بنانے کی تیاری کی جارہی ہے۔
رپورٹ میں بتایا گیا ہے کہ بھارتی فلمساز سری رام راگھون کے پروڈکشن ہاؤس نے گذشتہ برس پنجاب میں قتل ہونے والے گلوکار سدھو موسے والا کی زندگی پر لکھی جانے والی کتاب کے حقوق حاصل کر لیے ہیں۔
اس حوالے سے سری رام راگھون کے پروڈکشن ہاؤس کا کہنا ہے کہ یہ کتاب پنجابی میوزک انڈسٹری کے پُراسرار پہلوؤں، قتل کی دل دہلا دینے والی کہانی، شہرت اور المیے کی کہانی ہے۔
راحت فتح علی خان کا پرفارمنس کے دوران سدھو موسے والا کو خراج تحسین
کتاب کے لکھاری جُپندرجیت سنگھ کا اس حوالے سے کہنا تھا کہ اُن کی کتاب کے حقوق حاصل کرنے کے لیے متعدد پروڈکشن ہاؤسز نے اُن سے رابطہ کیا لیکن وہ سری رام راگھون کے ماضی کے کام سے بہت متاثر ہیں۔
یاد رہے کہ سری رام راگھون کے پروڈکشن ہاؤس نے حال ہی میں ’اندھادھن‘ اور ’مونیکا مائی ڈارلنگ‘ جیسی فلمیں اور ’اسکوپ‘ جیسی مشہور سیریز بنائی ہے۔
تاہم اب تک پروڈکشن ہاؤس کی جانب سے یہ واضح نہیں کیا گیا کہ اس کتاب پر فلم بنائی جائے گی یا سیریز۔
خیال رہے کانگریس کے رکن گلوکار سدھو موسے والا کو 29 مئی 2022 میں بھارت پنجاب کے ضلع مانسہ میں فائرنگ کر کے قتل کیا گیا تھا اور وہ موقعے پر ہی دم توڑ گئے تھے۔
انڈین اداروں کی تفتیش کے دوران یہ بات سامنے آئی تھی کہ سدھو موسے والے کے قتل کا ماسٹر مائنڈ بدنام زمانہ گینگسٹر لارنس بشنوئی تھا جبکہ کینیڈا میں مقیم اس کا قریبی ساتھی گولڈی برار بھی اس کیس میں زیر تفتیش رہا ہے۔
