بخاراسٹ: رومانیہ سے سعودی عرب جانے والے بحری جہاز کے الٹنے سے 14 ہزار سے زائد بھیڑیں ڈوب گئیں، ریسکیو اہلکار کوششوں کے باوجود صرف 33 بھیروں کو ہی بچاسکے۔
تفصیلات کے مطابق رومانیہ کی بندرگاہ کے قریب بحیرہ اسود میں کارگو جہاز الٹنے سے 14 ہزار سے زائد بھیڑیں ڈوب گئیں۔ ریسکیو اہلکار جہاز کے عملے کو بچانے میں کامیاب رہے لیکن بھیڑوں کو نہ بچاسکے۔
حکام کے مطابق جہاز میں 14 ہزار سے زائد بھیڑیں تھیں جنہیں سعودی بندرگاہ جدہ لے کر جایا جا رہا تھا۔ روانگی سے کچھ ہی دیر بعد جہاز بحیرہ اسود میں الٹ گیا۔
جانوروں کی حقوق کی تنظیموں نے الزام عائد کیا ہے کہ جہاز پر گنجائش سے زیادہ بوجھ لادا گیا تھا جس کے باعث حادثہ پیش آیا۔ تنظیم نے جانوروں کی بحری جہاز سے نقل وحرکت پر پابندی عائد کرنے کا مطالبہ کیا ہے۔
واضح رہے کہ 2007ء میں یورپی یونین کا حصہ بننے والے ملک رومانیہ کا شمار یونین کے غریب ترین ممالک میں ہوتا ہے اور اس کی برآمدات کا بڑا حصہ لائیو اسٹاک پر مشتمل ہے جو کہ زیادہ تر مشرق وسطیٰ کے ممالک کو برآمد کی جاتی ہے۔
رومانیہ کو اس سے قبل بھی جانوروں کی بحری نقل وحمل کی ناقص انتظامات پر خبردار کیا جا چکا ہے۔