اسلام آباد: 8 فروری کو ہونے والے عام انتخابات سے قبل قومی و صوبائی اسمبلیوں کے 5 ہزار سے زائد امیدواروں نے کاغذات واپس لے لیے۔
الیکشن کمیشن سے منسلک ذرائع نے بتایا کہ قومی اسمبلی کے 24.81 فیصد جبکہ صوبائی اسمبلیوں کے 24.66 فیصد امیدواروں نے کاغذات واپس لیے۔
ذرائع کے مطابق قومی اسمبلی کیلیے مجموعی طور پر 6 ہزار 999 کاغذات نامزدگی درست قرار دیے گئے تھے تاہم 1 ہزار 737 امیدواروں نے کاغذات واپس لے لیے، اب قومی اسمبلی کی نشستوں پر 5 ہزار 254 امیدوار الیکشن لڑ رہے ہیں۔
ذرائع نے بتایا کہ صوبائی اسمبلیوں کیلیے 17 ہزار 164 کاغذات نامزدگی درست قرار دیے گئے تھے ان میں سے 4 ہزار 233 امیدواروں نے کاغذات واپس لے لیے، اب 593 نشستوں پر 12 ہزار 853 امیدوار حصہ لے رہے ہیں۔
اس سے قبل ذرائع نے بتایا تھا کہ الیکشن سے قبل 88 امیدوار انتقال کر گئے جن میں سے قومی اسمبلی کے 9 اور صوبائی اسمبلیوں کے 79 امیدوار شامل تھے۔
ذرائع نے کہا تھا کہ این اے 8 باجوڑ اور کے پی 22 سے آزاد امیدوار ریحان زیب کو قتل کر دیا گیا تھا، این اے 8 باجوڑ اور کے پی 22 میں امیدوار کے قتل پر انتخابات ملتوی کر دیے گئے۔
ذرائع کا کہنا تھا کہ کے پی 91 کوہاٹ سے امیدوار عصمت اللہ 30 جنوری کو انتقال کر گئے۔ کے پی 91 کوہاٹ میں انتخابی امیدوار کے انتقال باعث انتخابات ملتوی ہوگئے۔
ذرائع کے مطابق حتمی فہرستوں کے اجرا سے قبل انتقال کے سبب 86 حلقوں میں الیکشن ملتوی نہیں کئے گئے۔
